[A:353]mar 'dzin pa ci zhig mnga'/ /mnga' bdag khyod ni snyigs dus tha ma 'dir/ /'dir smos ma zad rnam 'phrul bye ba brgya/ /brgya phrag du mas skad cig gcig la yang / /yang dag lam du grangs med 'gro ba 'dren/ /de nas kyang shas cher zab mo'i rnal 'byor gyi sku mtshams kho na la bzhugs/ byi lo'i dgun/ dpal bsam sdings kyi gdan sa bcu gnyis pa grub thob kyi 'khor lo sgyur ba sangs rgyas seng ge'i zhal snga nas la phyag na rdo rje 'chi bdag 'joms pa'i dbang / dpal nag po chen po/ lcam dral/ lha brgyad/ pu tra/ stobs 'phrog dbang po bsnyen dus kyi rjes gnang rnams sngon du 'gro ba'i man ngag gi po ti me 'bar ma la sogs pa'i zab mo'i khrid dang lung mang po zhig gnang / sngar smos pa ltar lce ston rin po ches rje 'di pa nag po chen po dngos su gzigs/ rje 'di'i gsung las kyang / rin po che bsam sdings pa 'di gzhigs kyin 'jigs su 'jigs su 'gro ba zhig gda' zhes/ yab sras phan tshun gcig la gcig mnyes shing dad par gyur te/ dam pa'i skye bos dam pa ngo shes kyi/ blun pos 'bad kyang dam par ci zhig rtogs/ /bung ba rgyang na gnas kyang padma'i dri/ /rtogs mod nye 'khor sbal pas de ltar min/ /grub brnyes 'di la dam pa min no zhes/ /ma rabs 'ga' yis lan brgyar smad byed mod/ /nya bas yid bzhin nor bur spangs pa ltar/ /smod byed de dag nyid kyi nyes par zad/ /lo de'i ston kha'u'i brag rdzong la phebs/ rgyal tshab dam pa dpon slob rnams la dpal gsang ba 'dus pa 'jam pa'i rdo rje sa lugs thun mong ma yin pa'i dbang gnang zhing / phyag len gyi 'grig kyang dpyis phyin par mdzad do/ /