[A:157]grol zhing thugs rjes gzhan rgyud smin par mdzad pa'i rnal 'byor gyi dbang phyug /zung 'jug rdo rje 'chang chen po'i chos kyi bang mdzod la 'dod dgur dbang sgyur ba'i gsang ba thams cad kyi bdag po/ dam can rgya mtsho'i tshogs kyis sku'i snang brnyan mngon sum du bstan nas gsung gis phrin las 'bad med du bsgrub pa'i mthu stobs kyi mgon po/ lha dang bcas pa'i skye rgu thams cad kyi ma 'dris pa'i mdza' bshes/ bdag cag gi dpal ldan bla ma dam pa rje btsun rdo rje 'chang chen po kun bzang chos kyi nyi ma blo ldan shes rab kun dga' rgyal mtshan dpal bzang po zhes mtshan yongs su grags pa'i ba dan srid rtse'i bar du g.yo ba 'di nyid ni nges par rdo rje 'chang chen po nyid dang dbyer ma mchis par tshad mas grub pa'i phyir/ de nyid kyi rnam par thar pa mtha' dag ni zhib tu brjod par sus kyang spobs pa ma yin mod/ 'on kyang bdag cag dang skal ba mnyam pa'i byis pa so so skye bo dag gi blo'i ngor tha mal pa'i bshes gnyen dam pa'i tshul bzung nas dus 'dir gangs ri'i ljongs kyi 'gro ba rnams rjes su bzung ba'i rnam par thar pa'i cha shas las brtsams te gleng bar bya ba la don gnyis te/ sku skye ba sngar ma'i rnam thar mdor bstan pa/ sku skye 'di nyid kyi rnam thar cung zad rgyas par bshad pa'o/ /dang po ni/ mgon khyod 'og min chen po'i zhing khams su/ /mngon byang rnam lnga'i rol rtsed mthar phyin te/ /slar yang sngo bsangs dga' mas khyab pa yi/ /nor 'dzin khyon gyi 'gro rnams ji snyed pa/ /rang rang skal par 'tsham pa'i snang brnyan gyis/ /'dul