[A:199]yid 'phrog mig gis bdud rtsir snang / /lho phyogs ma la ya'i rlung gis/ /shel dkar lcug phran bskyod 'dra ba'i/ /rgyal sras gzhon nu'i snang brnyan gyi/ /sgyu 'phrul dra ba'i rol rtsed ni/ /dag pa'i blo mtshor ci yang shar/ /bden bzhi ston pa lha yi rnga bo che/ /dbyug gus ma bsnun dal gyis sgra dbyangs 'byin/ /de bzhin yig drug gsang sngags dar dir gyi/ /rang sgra mkha' la grag pa rtag tu gsan/ /spyan ras gzigs dbang thugs rje'i 'od stong tshogs/ /gcig tu bsdus pa'i nyin byed dbang po khyod/ /gangs can gdul bya'i mkha' dbyings shar ba'i mod/ /skal ldan 'gro ba'i snying mun ma lus bsal/ /'og min dag pa'i zhing na rdo rje 'chang / /sa 'dzin dkar po'i spo la yab sras gsum/ /dbyer med gos dkar lcang lo'i ba dan ni/ /rig sngags 'chang ba yongs kyi cod pan la/ /'os par bkod pa'i dge mtshan zhal bzang ni/ /dri med ston gyi zla shel lta bur gzigs/ /bu khyod snyan brgyud rgya mtsho'i mnga' bdag tu/ /'ong bas legs zhes brtse bas 'doms pa bzhin/ /de la dbugs 'byin rig byed dga' ma de'ang / /dngos grub mtshan ma ster ba'i 'dzum zhal ni/ /snying gi padmo g.yo ba'i nags klung ltar/ /yid kyi brtan pa 'phrog pa'i lang tshor sprul/ /de ltar rdo rje 'chang chen po'i gsang ba thams cad kyi bang mdzod la dbang sgyur ba'i bdag nyid chen por bzhugs pa dang / rigs sngags kyi bzlas brjod kyi nus pa mthar phyin pa'i mthus/ dam can rgya mtsho'i tshogs rnams kyis kyang mngon sum du zhal bstan nas 'phrin las thams cad 'bad med du bsgrub pa yin te/ de dag gi tshul ni sku na phra mo'i dus dpal mgon gyi sngags ring