[A:194]ring du 'byams pa'i snang ba byung 'dug cing / rje 'di'i sku nyams kyi thog ma'ang rgyal tshab dam pa la kye rdo rje'i dbang bskur ba zhu ba'i tshe skyes pa yin gsung / thugs shin tu dad par mdzad/ de nas dgung lo nyi shu tsam bzhes pa'i dus bsam 'grub rtser ye shes kyi mkha' 'gro'i mtshan dang ldan pa'i rig ma zhig dang lhan cig bzhugs pa'i rkyen gyis phyi rol gyi snang ba 'di thams cad la bden 'dzin hrul por zhig nas rang kha ba'i snang ba 'di ye med par du ba'am/ mig rgyu'i phung po lta bur gyur cing / de kha'i ngang du bzhag pa na mthar/ je dngas je gsal nam mkha' g.ya' dag pa lta bu'i brjod med kyi bde ba dang bcas pa'i ngang du gnas pas phebs gzhud dang gsol bzhes pa gsung 'byin pa sogs kyang dran 'dzin drag pos bzung kyang yang yang de ka'i ngang du thim 'gro ba'i thugs nyams zla ba gcig tsam gyi bar du byung 'dug /'di lta bu ni rgyud sde'i don shes pa'i mkhas pa gzu bor gnas pa dag gis bltas na shin tu ngo mtshar ba'i rnam thar du snang ngo / /gzung 'dzin 'khrul pa'i sprin thag chod pa na/ /yongs 'dzin nyi ma'i bkra shis mtshams sbyor gyis/ /bde stong 'dab brgya'i spu long bzhad pa'i rtser/ /dngos grub bdud rtsi'i zil mngar 'dzin par gyur/ /he ru ka dpal rnal 'byor dbang po khyod/ gang du bzhugs pa rdo rje'i pho brang ste/ sras bcas rgyal ba bskyed dang rol pa'i yum/ /ma lus mkha' 'gro'i gtso mo rnal 'byor ma'ang / /smin legs dga' ma'i zol gyis mngon sum du/ /'dzum dkar g.yo ba'i chu skyes zlos