[A:190]zab mo rnams la rtse gcig tu nyams bzhes brtson par mdzad pa'i mthus so so'i gzhung lugs nas bshad pa'i nyams rtogs rnams ji lta ba bzhin thugs rgyud la 'khrungs par gyur cing / lhag par snga mo nas thugs kyi 'dun pa la lho bod kyi mtshams sogs mi med lung stong zhig tu sku tshe hril po sgrub pa la sgril ba'i thugs mdun drag po yod 'dug /rjes su de ni cung ma grub na'ang / tsha mo rong byang chub rdzong / gnam kha'u'i brag rdzong / bya 'gyur rdo rje'i brag sogs gtsang dbus kyi ri khrod mang por rgyun ring po'i bar du sgrub pa lhur len par mdzad cing / dus rgyun du'ang gsung ngag rin po che sogs gsung chos rnam grangs mang ba gnang ba'i skabs lta bu dmigs bsal re re tsam ma gtogs nyi ma phyed yan thugs dam kho na la bzhugs par mdzad cing mtshan mo'ang srod la cung zad tsam mnal nas de 'phral lus gnad dang bcas te thugs dam 'ba' zhig gi ngang du bzhugs/ rgyun gyi nyams bzhes kyang phal cher spros med kho na'i ngang du mnyam par 'jog pa yin la/ phyi rol gyi snang ba dang sgo bstun nas spros bcas kyi rim pa'ang nyin zhag re'i nang du thun bzhi'i nges pas/ dpal ldan sa skya pa'i zab don thams cad kyi bcud phyung ba'i lam zab mo bla ma'i rnal 'byor phyi nang sbrags ma/ bdag chen rdo rje 'chang chen po gtso bor bzhugs pa'i yongs 'dzin dam pa bdun cu rtsa gnyis mtshan nas brjod de gsal gtab pa'i sgo nas gsol ba 'debs pa/ zhen pa spang pa/ dbang bzhi len pa rnams thugs yul du ches cher gsal ba'i nges shes ma skyes kyi bar du bsgom par mdzad cing / mthar lta ba blo