[A:186]pa/ mthu stobs kyi dbang phyug mkha' reg bon drug pa rnams dang / rgya bod thams cad du yongs su grags shing yi ge drug pa'i 'phrin las kyi rgyun gyis 'khor ba mtha' can du mdzad pa'i grub chen thang stong rgyal por grags pa/ grub thob chen po gzi kun spangs pa/ rdo rje phag mo'i rnam sprul rje btsun mtshan ldan ma la sogs pa/ mdor na yongs 'dzin dam pa bdun cu rtsa gnyis bsten cing mnyes pa gsum gyi sgo nas mnyes par mdzad de/ gtso bor dpal ldan sa skya pa yab sras las brgyud pa'i rnal 'byor dbang phyug birWa pa'i bshad srol gyis gtso byas pa'i dpal kye rdo rje'i chos skor mtha' dag /'khor lo bde mchog gi chos skor ji snyed pa/ mar 'gos rnam pa gnyis sogs nas brgyud pa'i gsang ba 'dus pa 'phags lugs kyi chos skor gnyan lo sogs nas brgyud pa'i ye shes zhabs lugs kyi chos skor/ rwa skyo zhang sogs nas brgyud pa'i gshin rje gshed nag po'i chos skor/ dpyal lo chag lo glo bo lo tsA ba sogs nas brgyud pa'i gshin rje gshed dmar po'i chos skor/ shaM bha la'i bshad srol dpal dus kyi 'khor lo'i chos skor sogs/ mdor na rgyud sde bzhi dang 'brel ba'i dbang byin rlabs/ rgyud lung man ngag /phyag len gyi mtha' rten pa'i rnam grangs shin tu mang ba bsam pa'i ra ba las 'das pa zhig nod par mdzad/ yang grub chen nA ro dang / mai tri'i thugs bcud rje mar pas bod yul du spyan drangs pa'i dwags po bka' brgyud du grags pa'i chos skor/ ye shes mkha' 'gro ma ni gu ma dang / su ka ma siddhi'i gdams pa sogs mkhas grub chen po shangs pa du gu pa