[A:169]che chung rnams gtsug gi nor bu ltar gus pas mchod pa dang / gzhis ka rnams su cho 'phrul gyi zla ba la srog gcod spong ba sogs sems can gyi srog skyob cing / mi nag can rnams kyang srog la mi 'bab pa'i zhu ba do dam rkang len mdzad/ gsung las kyang nga mi bsod nams can rang yin/ /sne sdong pa dang gzhis ka rin spungs pa'i khur de tsam khur kyang mi gsod pa lta ci smos brdung ba tsam yang byed ma myong kyang thams cad kyang nga gang zer la nyan pa kho na byung gsung / dus phyis sde pa don yod rdo rje pas khyed rang gzhan dang mi 'dra bas nged la lugs gnyis kyi snyan bskul tshigs bcad tsam re dgos gsungs pas/ 'jig rten gyi rtsa ba gzhung phyi thag dang khrel ngo tsha yin/ chos kyi rtsa ba bsam pa bzang ba yin gsung pa gnang zhing / mdor na bdag nyid chen po 'di skye ba du mar byams pa dang snying rje la goms shing / rlabs po che'i bsod nams rgya chen po bskrun pa'i mthus rgyal srid chos bzhin du bskyangs pas mnga' 'bangs su gtogs pa thams cad du 'khrug pa dang / mu ge dang yams nad la sogs pa mi mthun pa'i phyogs thams cad ming gi lhag ma tsam du gyur cing / bstan pa la dga' ba'i lha dag gis char gyi rgyun dus su phab ste lo tog dang 'bru rnams yongs su rgyas pa dang / skye rgu rnams bde zhing dal bar rgyu bas rdzogs ldan gyi dus bzhin du gyur/ bshad sgrub kyi sgo nas bstan pa 'dzin pa'i skyes bu dam pa rnams lung rtogs kyi yon tan yar ngo'i zla ba ltar rgyas shing chos dang mthun pa'i rnyed pa dang bkur