[A:592]nyes pa med/ don ma go na grwa skor byas kyang dgos pa med pas cis kyang dge sbyor la dril ba drag ces gsung / 'o na de ltar byed par zhu zhus nas/ thog mar ni gu chos drug gi khrid byin rlabs dang bcas pa/ sems 'chi med rnams kyi khrid zhus nas/ chos drug rdo rje'i tshig rkang / tshig gsal them yig /mus chen pas mdzad pa'i khrid yig /sgyu ma lam rim rtsa 'grel sgyu ma gtan la dbab pa/ sgyu lus 'dzin pa rang grol/ lam dri ma med pa la sogs pa'i ni gu'i chos skor rdzogs pa zhus/ yang nA ro chos drug gi khrid zhus nas nA ro'i khrid yig thabs lam tshigs bcad ma la sogs pa nA ro chos drug gi chos skor rdzogs par gsan/ yang phyag rgya chen po snying po don gyi khrid yig la sogs pa phyag rgya chen po'i chos skor rnams dang / yang dgon pa'i ri chos yon tan kun 'byung la sogs pa ri chos kyi skor rnams dang / blo sbyong rtse mo gnyis pa la sogs pa blo sbyong gi skor 'ga' zhig dang / zhi byed skam lugs kyi khrid zhus nas/ zhi byed bla ma brgyud pa'i lo rgyus che chung gnyis la sogs pa'i zhi byed kyi skor yongs su rdzogs pa gsan te/ de dag kyang ming rkyang tsam du ma las par so so'i nyams rtogs rnams rgyud la skyes skyes kyi bar du brtson pa drag pos bsgoms pas/ chos rje'i zhal nas khyod la nyams rtogs 'di dang 'di 'dra byung 'dug go zhes ngo sprod kyang mdzad/ gzhan yang dbang gi skor la/ tshe dpag med/ kun rig /'jigs byed ro langs brgyad skor/ bde mchog dril bu pa rnams kyi dbang gsan no/ /nyer brgyad pa la slar yang chos rje rgyal mchog pa'i chag phyir byon te/ so gcig pa'i bar du lus dang grib ma bzhin du 'bral ba med par bsten/ /spyod lam gyis kyang mnyes par byas te/ phar phyin/ tshad ma/ dbu ma/ mngon pa kun las btus/ 'dul ba mdo rtsa la sogs pa'i pha rol tu phyin pa'i gzhung rnams legs par sbyangs par mdzad do/ /de'i tshe kun btus