[A:590]par mdzad do/ /de yang 'di skad thos te/ dgung lo bcu gsum bzhes pa na/ mus kyi chos sde gle lung zhes bya bar/ chen po byang seng ba sku mched kyi drung du byon te/ phar phyin dang spyod 'jug la thugs sbyong mdzad/ bar skabs su bla ma nam chos bzang po la dus 'khor yongs rdzogs kyi dbang / 'jigs byed kyi dbang gsan cing / byang seng ba las phar phyin bu TIka gi skabs dang gi lung dang / zhing mo che ba'i blo sbyong yang gsan te/ bco brgyad pa na chos sde nyid du bshad pa dang / de'i dga' ston rgya chen po mdzad do/ /nyi shu pa na mus kyi gnas gsar zhes bya ba'i gtsug lag khang du/ grub pa'i dbang phyug chen po mnyam med nam mkha'i rnal 'byor pa'i zhabs drung du byon te/ shes rab kyi pha rol tu phyin pa'i man ngag gcod kyi khrid zhus nas/ spyir gcod khrid la thun drug tu byed pa yin na yang / thun gyi bye brag med par nyin mtshan khor yug tu brtson pa drag pos bsgoms pas thugs dam gyi gzigs snang mang po dang / byams pa dang snying rje tshad med pa thugs rgyud la 'khrungs/ khyad par du bla ma'i rnal 'byor bsgoms te/ yum gyi skye ba phyi ma gang yin bstan du gsol zhes gsol ba drag tu btab nas gzigs pas/ 'di dang 'di yin zhes pa'i mtshan ma lan gnyis su byung ba sogs kyi nyams rtogs khyad par can mang du 'khrungs so/ /de nas de'i chos skor la/ skye med do pa nas brgyud pa'i gcod kyi khrid/ ma gcig sogs kyi lo rgyus/ grwa pa hag gi lo rgyus/ rgya nag gcer bu'i bka' brgyud/ sma ra ser po'i bka' brgyud/ /bka' tshoms kyi gzhung / bka' tshoms kyi gzhung lan so lnga pa/ Arya de ba'i tshigs bcad che chung gnyis 'grel pa dang bcas pa dang / ngo sprod lta ba'i skor/ nyams len spyod pa'i skor/ bogs 'don gegs sel gyi skor/ lam rim pa bcu gsum la sogs pa ma gcig gi chos skor yongs su rdzogs pa gsan no/ /nyer gcig