[A:589] rje 'di nyid chung ngu'i dus nas phyi rol gyi dngos po'i 'gyur ba tsam la brten nas kyang mi rtag pa'i blo skyes te/ 'jig rten thams cad la zhen pa log pa dang / phyogs mtha' med du mi dang / ba glang dang / ri dgas sogs rab tu mang po yod pa la dpags nas 'khor ba mtha' med du rtogs te/ nges 'byung gi blo drag po skyes pa dang / dgung lo gnyis gsum tsam na yab yum gyi rum du gzims pa'i dus su snang ba bden med du rtogs pa'i ting nge 'dzin bzang po skyes pa dang / rtsed mo rtse ba'i dus su yang rdo ba dang tsha khang gi lha la sogs pa che ba rnams la chung ba rnams btud nas btsun pa gyis/ dbang bskur zhus zhes bya ba la sogs pa las tha mal gyi rtsed mo mi mdzad pa dang / brag phug sogs su sleb pa'i tshe sgom byed pa'i rnam 'gyur mdzad pa sogs rnam pa thams cad du dge ba bsgrub par bzhed pa'i ngang tshul can yin par grag go /de nas dgung lo dgu tshun chad du bla ma gu ru pa zhes bya ba dang / bla ma mkha' 'gro ba zhes bya ba'i bud med cig dang / bla ma nam mkha' blo gros pa rnams la chos cung zad gsan no/ /gsum pa ni/ bstan la 'jug tshe zhes sogs tshigs bcad gcig ste/ dgung lo dgu bzhes pa'i dus su/ mkhan po rgyal sras thogs pa med pa'i dngos slob dbang 'od bzang po/ slob dpon dpal 'od pa las dge tshul gyi sdom pa mnos te/ mkhan po las/ kye rdor man ngag lugs kyi dbang / theg pa chen po'i blo sbyong zin bris ma/ 'gro mgon dpal ye bas mdzad pa'i rgyal sras pa'i rnam thar gyi lung rnams gsan no/ /bzhi pa la gnyis te/ 'dren pa gzhan las ji ltar gsan pa'i tshul/ 'dren pa mchog las ji ltar gsan pa'i tshul lo/ /dang po ni/ thos pa rgya mtsho'i zhes sogs tshigs bcad bdun te/ skyes bu dam pa rnams ni skye ba thams cad du yang dag pa'i lam la goms pa'i stobs kyis/ gzhon nu'i dus nas thos pa rgya mtsho'i gling du 'jug