[A:618]lung rigs kyis bkag nas rgyud sde'i dgongs pa man ngag bzhin ston par mdzad pa zhig go /khyad par du snyan brgyud tshad ma bzhi ldan gyi sgo nas gangs ri'i khrod kyi don gnyer rnams rnam grol gyi lam la bkod par mdzad de/ sngar phan chad gsung ngag tshar nyi shu rtsa lnga tsam gsung bar mdzad do/ /gzhan yang rgyud 'bum dang / 'dul ba lung dang dgongs 'grel gyi bstan bcos chen po rnams dang / bla ma brgyud pa'i bka' 'bum gyi lung rnams kyis kyang dri ma med pa'i bstan pa spel bar mdzad do/ /gsum pa ni/ 'di ltar dri med ces sogs tshigs bcad gnyis te/ sngar bshad pa de ltar rang don mkhyen pa dang thugs rje phul du byung zhing / gzhan don phrin las rmad du byung ba mdzad pa'i stobs kyis gangs ri'i khrod kyi che bar grags pa mgon po 'jam pa'i dbyangs kyi rnam 'phrul bdag chen gzhi thog pa kun dga' dbang phyug legs pa'i 'byung gnas rgyal mtshan dpal bzang po/ bdag chen blo gros dbang phyug legs pa'i 'byung gnas rgyal mtshan dpal bzang po/ bdag chen grags pa rgyal mtshan dpal bzang po/ bdag chen gzhi thog pa blo gros rgyal mtshan dpal bzang po/ bdag chen shar pa ye shes dbang phyug rgyal mtshan dpal bzang po la sogs pa skye dgu'i gtsug rgyan rnams kyis kyang zhabs kyi padmo la gtugs shing gdams pa zab mo nos te spyi bo'i cod pan du khur bar mdzad do/ /gzhan yang lung rigs la dbang bsgyur ba'i mkhas pa chen po byams chen mkhan po bsod nams chos kyi kun dga' bkra shis rgyal mtshan dpal bzang po/ glang thang spyan mnga' ba kun dga' rdo rje sku mched/ dro pa mkhan po chos kyi spyan ldan shes rab bzang po/ ngam rings mkhan po kun dga' grub dang / mkhas pa sangs rgyas seng ge /mkhas pa'i dbang po don yod dpal bzang po/ bstan pa'i rtsa lag kun mkhyen sangs rgyas 'phel/ mkhyen rab kyi dbang phyug nam mkha' bsod nams la sogs pa gangs ri'i khrod kyi mkhas pa dag gis khyod kyi gsung thub pa'i gsung ltar gus pas bsten cing phyogs bcur spel bar mdzad do/ /brgyad pa ni/ ris bsgyur phyogs ni zhes sogs