[A:༦༡༨]ལུང་རིགས་ཀྱིས་བཀག་ནས་རྒྱུད་སྡེའི་དགོངས་པ་མན་ངག་བཞིན་སྟོན་པར་མཛད་པ་ཞིག་གོ །ཁྱད་པར་དུ་སྙན་བརྒྱུད་ཚད་མ་བཞི་ལྡན་གྱི་སྒོ་ནས་གངས་རིའི་ཁྲོད་ཀྱི་དོན་གཉེར་རྣམས་རྣམ་གྲོལ་གྱི་ལམ་ལ་བཀོད་པར་མཛད་དེ། སྔར་ཕན་ཆད་གསུང་ངག་ཚར་ཉི་ཤུ་རྩ་ལྔ་ཙམ་གསུང་བར་མཛད་དོ། །གཞན་ཡང་རྒྱུད་འབུམ་དང༌། འདུལ་བ་ལུང་དང་དགོངས་འགྲེལ་གྱི་བསྟན་བཅོས་ཆེན་པོ་རྣམས་དང༌། བླ་མ་བརྒྱུད་པའི་བཀའ་འབུམ་གྱི་ལུང་རྣམས་ཀྱིས་ཀྱང་དྲི་མ་མེད་པའི་བསྟན་པ་སྤེལ་བར་མཛད་དོ། །གསུམ་པ་ནི། འདི་ལྟར་དྲི་མེད་ཅེས་སོགས་ཚིགས་བཅད་གཉིས་ཏེ། སྔར་བཤད་པ་དེ་ལྟར་རང་དོན་མཁྱེན་པ་དང་ཐུགས་རྗེ་ཕུལ་དུ་བྱུང་ཞིང༌། གཞན་དོན་ཕྲིན་ལས་རྨད་དུ་བྱུང་བ་མཛད་པའི་སྟོབས་ཀྱིས་གངས་རིའི་ཁྲོད་ཀྱི་ཆེ་བར་གྲགས་པ་མགོན་པོ་འཇམ་པའི་དབྱངས་ཀྱི་རྣམ་འཕྲུལ་བདག་ཆེན་གཞི་ཐོག་པ་ཀུན་དགའ་དབང་ཕྱུག་ལེགས་པའི་འབྱུང་གནས་རྒྱལ་མཚན་དཔལ་བཟང་པོ། བདག་ཆེན་བློ་གྲོས་དབང་ཕྱུག་ལེགས་པའི་འབྱུང་གནས་རྒྱལ་མཚན་དཔལ་བཟང་པོ། བདག་ཆེན་གྲགས་པ་རྒྱལ་མཚན་དཔལ་བཟང་པོ། བདག་ཆེན་གཞི་ཐོག་པ་བློ་གྲོས་རྒྱལ་མཚན་དཔལ་བཟང་པོ། བདག་ཆེན་ཤར་པ་ཡེ་ཤེས་དབང་ཕྱུག་རྒྱལ་མཚན་དཔལ་བཟང་པོ་ལ་སོགས་པ་སྐྱེ་དགུའི་གཙུག་རྒྱན་རྣམས་ཀྱིས་ཀྱང་ཞབས་ཀྱི་པདྨོ་ལ་གཏུགས་ཤིང་གདམས་པ་ཟབ་མོ་ནོས་ཏེ་སྤྱི་བོའི་ཅོད་པན་དུ་ཁུར་བར་མཛད་དོ། །གཞན་ཡང་ལུང་རིགས་ལ་དབང་བསྒྱུར་བའི་མཁས་པ་ཆེན་པོ་བྱམས་ཆེན་མཁན་པོ་བསོད་ནམས་ཆོས་ཀྱི་ཀུན་དགའ་བཀྲ་ཤིས་རྒྱལ་མཚན་དཔལ་བཟང་པོ། གླང་ཐང་སྤྱན་མངའ་བ་ཀུན་དགའ་རྡོ་རྗེ་སྐུ་མཆེད། དྲོ་པ་མཁན་པོ་ཆོས་ཀྱི་སྤྱན་ལྡན་ཤེས་རབ་བཟང་པོ། ངམ་རིངས་མཁན་པོ་ཀུན་དགའ་གྲུབ་དང༌། མཁས་པ་སངས་རྒྱས་སེང་གེ །མཁས་པའི་དབང་པོ་དོན་ཡོད་དཔལ་བཟང་པོ། བསྟན་པའི་རྩ་ལག་ཀུན་མཁྱེན་སངས་རྒྱས་འཕེལ། མཁྱེན་རབ་ཀྱི་དབང་ཕྱུག་ནམ་མཁའ་བསོད་ནམས་ལ་སོགས་པ་གངས་རིའི་ཁྲོད་ཀྱི་མཁས་པ་དག་གིས་ཁྱོད་ཀྱི་གསུང་ཐུབ་པའི་གསུང་ལྟར་གུས་པས་བསྟེན་ཅིང་ཕྱོགས་བཅུར་སྤེལ་བར་མཛད་དོ། །བརྒྱད་པ་ནི། རིས་བསྒྱུར་ཕྱོགས་ནི་ཞེས་སོགས་