[A:614]'di ltar gyis kyi zhal da mdor bsdus dang / 'di dang mus gnyis yar 'byon mar 'byon gyis la bstan pa'i bya ba rgyun ma chad par mdzod gsungs te/ dam pa'i chos kyi rgyal tshab chen por dbang bskur bar mdzad do/ /gnyis pa la gsum ste/ rjes kyi bya ba mdzad tshul/ chos kyi 'khor lo bskor tshul/ 'bras bu bstan 'dzin bskrun tshul lo/ /dang po ni/ dam tshig sdom la zhes sogs tshigs bcad gsum ste/ dam tshig la nyes pa'i dri ma med pa dang / bla ma la lhag pa'i lha dang dbyer med du blta ba'i phyir na/ de'i thugs dgongs rnams ji lta ba bzhin bsgrub par mdzad de/ chos rje nyid kyis zhal da'i lugs bzhin/ phyag rdzas kyi steng nas rten gsum gyi drung du mar me'i phreng ba la sogs pa'i mchod rdzas ched du bzhag par 'os pa rnams ni de ltar bzhag /gdan sa chen po dang / gsang phu dang / nA lendra la sogs pa'i chos sde chen po rnams su dge 'dun la bsnyen bkur bya bar 'os pa rnams ni phun sum tshogs par bsgrubs/ e waM chos ldan du bzhugs pa'i dge 'dun rnams la gnang sbyin mdzad par 'os pa rnams ni skabs su babs par bsgrubs/ gshegs rjes kyi gsol 'debs dang / lo dus kyi dus chen rnams la rnal 'byor bla na med pa'i dkyil 'khor chen po rnams kyi phyag len rnam par dag pa'i sgrub mchod kyi rgyun btsugs/ zla ba byung ngo cog gi dus mchod la dge 'dun gyi bsnyen bkur rnam par dag pa yang 'dzugs par mdzad do/ /gzhan yang sku'i rten du chos rje nyid kyi sku 'dra sku tshad ma dang / thub pa chos 'chad ma shin tu che ba zangs gser las grub pa dang / gsung gi rten du rje btsun sa skya pa yab sras lnga/ chos rje nyid dang bcas pa'i bka' 'bum dang / thugs kyi rten du gtsang khang gi nang du/ gdung tsha bzhugs pa'i mchod rten shin tu che ba gser gyis spras pa dang / phyi rol du bde gshegs mchod rten brgyad/ re re la yang gser gdugs gser tog dang bcas