[A:610]bka' ma chad pa gyis gsungs nas chos 'di'i bdag po dbang bskur bar mdzad do/ /gnyis pa la gnyis te/ mnyam gzhag gi nyams len dang / mnyam par ma bzhag pa'i nyams len no/ /dang po ni/ dbang gis mtshon pa'i zhes sogs tshigs bcad lnga ste/ dang pos lta ba/ gnyis pas phyi bskyed rim/ gsum pas nang bskyed rim/ bzhi pas rdzogs rim nyams su blang tshul dang / lnga pas bsgoms pa las byung ba'i drod rtags bstan no/ /de yang bdag nyid chen po 'dis nyams len thams cad la dbang gis mtshon pa'i lta ba brjod bral zung 'jug gis rgyas btab nas nyams su blang bar mdzad pa'i stobs kyis/ srin po gdong du ri khrod mdzad pa'i tshe/ brag chen po ral nas cha ther dum bur btang zhing / mtha' rdo phung gis non pa'i nang du sku lus la cung zad tsam yang gnod pa med par bzhugs so/ /phyi bskyed pa'i rim pa bsgom pa'i tshe/ sgra tshul dang mngon byang la sogs pa'i bskyed chog thams cad sbyang gzhi sbyong byed sbyor ba la gnad du bsnun cing / nang bskyed rim bsgom pa'i tshe/ 'khor lo lnga dang yul nyi shu rtsa bzhi la sogs pa'i rtsa thig rnams la gnad du bsnun nas bsgoms pas tha mal gyi snang ba ye shes lngar 'char/ rtsa rlung rgyal bas byin gyis brlabs par mdzad pa yin no/ /rdzogs rim bsgom pa'i tshe/ rgyud sde nas gsungs pa'i rtsa rlung thig le'i rnal 'byor dang / rdo rje lus kyi 'khrul 'khor la sogs pas gzung 'dzin bskyed pa'i rlung sems dbu mar bcug nas bde stong mchog gi ye shes mngon du mdzad de/ shAka bzang sku 'bum du chos rje'i drung du 'khrul 'khor mdzad pa'i tshe/ ting nge 'dzin la yun ring po cig song 'dug /de'i stobs kyis phyis a mar rgyab pa'i tshe/ ting nge 'dzin bzang po re skye ba yin gsungs pa lta bu'o/ /de ltar rim gnyis kyi ting nge 'dzin bsgoms pa'i stobs kyis lus nyams dang / sems nyams dang / gzhan sems shes pa la sogs pa'i yon tan mngon du mdzad de lha gong ri khrod du dge