[A:609]la sku mtshams dam par mdzad nas thugs dam la rtse gcig tu bzhugs so/ /gnyis pa la gnyis te/ pha rol tu phyin pa'i nyams len mdzad tshul/ rdo rje theg pa'i nyams len mdzad tshul lo/ /dang po la/ don dam byang chub kyi sems nyams su blang tshul ni/ dben gnas dngul chur zhes sogs tshigs bcad gcig ste/ dngul chur blo sbyong zhus nas don dam byang chub kyi sems bsgom pa'i tshe/ snang ba'i dngos po thams cad dngul chu'i rgya mtsho bzhin du tshugs mi thub par rnam par g.yo zhing / rtsig pa dang ri la sogs pa la thogs med du 'jug nus pa'i nyams myong rgyud la skyes par mdzad do/ /kun rdzob byang chub kyi sems nyams su blangs pa'i tshul ni/ rgyun chad med par zhes sogs tshigs bcad bzhi ste/ theg pa chen po'i blo sbyong gi don bsgom pa'i gnas skabs thams cad du snying rje chen pos kun nas bslangs te/ bdag gzhan brje ba'i byang chub kyi sems goms par mdzad pa'i stobs kyis/ ri khrod dben pa rnams su bzhugs pa'i tshe/ gna' ba la sogs pa'i ri dwags 'dus nas la la pang du nyal/ la las rgyab nas phul te/ bu chung ngu ba ma la btud pa bzhin mig rig rig zhal du bltas par gyur to zhes thos so/ /yang ri khrod cig tu gna' mo cig dang / gna' khyi cig mnyam du gsos pas phan tshun byams sems dang ldan par gyur te/ nam zhig khyi yul du khrid pa'i tshe/ gna' mos khyi la bltas nas mar la 'gro/ /rje la bltas nas yar 'ong ba'i tsab tsob tu gyur to zhes gsungs so/ /gzhan yang snying rje chen po g.yos pa'i stobs kyis/ mtshan thog thag tu bshums pa la sogs pa'i rnam thar bsam gyis mi khyab pa'i phyir na/ re gsum pa la bu le rong du chos rje sems dpa' chen po gzhon nu rgyal mchog pa'i drung du mjal du byon pa'i tshe/ blo sbyong don bdun ma'i khrid dang / blo sbyong gi rgya gzhung dang / bod gzhung gi lung rab tu mang po gnang nas/ da chos bdag po'i lag tu 'phrod pas blo bde/ khyod kyis blo sbyong 'di'i