[A:482]bzung ba 'di'i dbang du byas pa'i rnam par thar pa cung zad cig brjod par bya ba la gnyis te/ rab tu ma byon pa dang / rab tu byon pa'i rnam par thar pa'o/ /gu ge paN chen gyis sa bcad gsum du mdzad/ chos dpal bzang pos sngar mdzad pa sogs mang yang gnad don gcig go /dang po rab tu ma byon gong gi rnam thar ni/ rje 'di'i rigs dang gdung ni/ rgyal po chen po'i sku zhang du gyur pa cog ro'am cog grur grags pa cog ro klu'i rgyal mtshan la sogs pa mang du byung ba'i brgyud pa bzang po'o/ /yab mes gong ma rnams 'bring 'tshams nas sa skya phyogs su byon te/ ga ra la sogs par 'brog mdzad cing bzhugs pa las rim gyis bdag chen gzhi thog pa'i gsol ja bar gyur pa yin la/ khyad par rje 'di nyid kyi phyi ltar gyi yab ni/ sa skya tshogs kyi nye gnas chen po dpon tshang grub pa yon tan zhes bya ba dpal ldan bla ma dam pa'i drung nas zhus pa'i yongs rdzogs dge bsnyen yin cing / nang ltar na bdag chen gzhi thog pa kun dga' rin chen yin te/ grub chen srad pa kun blos/ phyi ltar nye gnas chen po grub pa'i sras/ /sbas pa'i yab ni bdag chen kun rin yin/ /dpal ldan kun dga'i rigs brgyud sa skya pa/ /dpal ldan sa skya pa la gsol ba 'debs/ /zhes gsungs/ nges don gsang ba ltar na/ gser 'od dam par/ sku la rus pa khrag med cing / /zhes sogs gsungs pa ltar/ yab yum gyi tshul bstan pa tsam ma gtogs sprul par snang ste/ mnyam med zas gtsang sras po yum gyi lhums su 'jug pa na yum gso sbyong la gnas pa'i tshe glang chen thal kar gyi rnam pas zhugs pa dang tshul mtshungs te/ rje 'di lhums su 'jug pa na ngo mtshar ba'i ltas du ma dang bcas shing / dge slong tshul bkras zhes bya ba rdo rje rnam 'joms kyi grub thob cig yod pa