[A:483]de'i mnal lam du/ bla ma rje btsun gong ma rnams kyi phyi rten sku 'bum rnams kyi bum pa las 'od zer kha dog sna tshogs pa dang / khyad par rje btsun grags pa rgyal mtshan gyi phyi rten bum pa'i bum pa nas 'od dkar po du ma 'phros te/ sa skya tshogs kyi 'gram na khang pa yod pa'i dbyar dus mthong kha'i thad du yum gzims pa'i lus la phog pa rmis/ de dang dus mthun par sku lus dang ldan par gyur pas de nas lung bstan mdzad pas so/ /yum ni sgrol ma dkar mo'i rnam 'phrul bla brang rin chen sgang pa'i dpon skya shab kyi smad kyi skye yul ma dpon seng ge zhes bya ba'i sras mo bsod nams dpal 'dren zhes bya ba/ dpal ldan bla ma dam pa bsod nams rgyal mtshan gyi drung du zhus pa'i sna 'ga' spyod pa'i dge bsnyen ma yin no/ /de skad du mkhas pa kun blos/ yum gyur sgrol ma dkar mo'i sprul pa mchog /sa skya'i zhabs 'khrungs bsod nams dpal 'dren yin/ /zhes so/ /gang du skye ba bzhes pa'i gnas ni dpal ldan sa skya zhes snyan grags srid pa gsum na gsal ba bod kyi rdo rje gdan nyid yin no/ /nam lhums su zhugs pa'i dus ni/ yab me pho sprel lo pa nyi shu rtsa bdun pa dang / yum sa pho khyi lo ma nyi shu rtsa lnga ma la lhums su zhugs dus skyes bu dam pa yum gyi lhums su zhugs pa'i mtshan ltas dang ldan par gyur cing / brang khang byi khrung sgo na bzhugs pa'i dge slong tshul bkras pa la sngar bshad pa'i rmi lam de byung nas/ yum la khyed kyi lhums na bzhugs pa 'di la skyes bu dam pa cig 'byon par 'dug pas bar chad kyi dbang du ma shor bar mdzod cig ces lung bstan mdzad do/ /dge slong de yang gang zag bzang po zhig yin te/ khong sku gshegs pa'i tshe ngo mtshar ba'i ltas du ma dang bcas te gshegs so zhes grag go /de nas khong gi gsung bzhin mdzad par dgongs te/