[A:481]mthong ba'i yi ge gzhan gyis kha bskang nas bkod pa la/ rgyal tshab mus pas mdzad pa 'di lta ste/ #/ /rje btsun kun dga' bzang po'i rnam thar bzhugs so//
/ /rje btsun bla ma thugs rje chen po dang ldan pa'i zhabs la gus pas phyag 'tshal lo/ /dge legs kun 'byung tshul khrims sa gzhir byang chub sems kyi myu gu 'khrungs/ /gsung rab mkha' la thos bsam sprin tshogs lung rigs snyan pa'i 'brug sgra can/ /bslab gsum rim gsum zim bu'i char babs skal ldan rma bya'i tshogs rab dga'/ /don gnyis lo thog tog ?bzang po mthar phyin bla ma'i zhabs kyi padmor 'dud/ /rgyal ba kun gyi mkhyen brtse gcig bsdus 'tha' yas 'gro ba'i gnyen gcig po/ /rmongs pa'i mun pa drung nas rab 'byin bder gshegs bstan pa'i sgron me 'dzin/ /dmigs med thugs rjes gzhan don la dga' rgya chen lhun gyis grub pa yis/ /phrin las bzang po'i nor bu rin chen skye dgu'i gtsug na mdzes la 'dud/ shes bya kun la legs sbyangs mthar phyin nas/ /mkhas rnams dga' ba'i 'chad rtsod rtsom pa yis/ /bstan pa'i khur chen ring du khyer ba po/ /phyogs las rnam rgyal bzang po'i zhabs pad 'dud/ /de yi rnam thar mtha' dag sus brjod spobs/ /rgya mtsho che las chu yi thigs pa ltar/ / ding deng ?sang yongs grags phrin las rgya mtsho las/ /cha shas tsam zhig dang bas 'dir brjod bya/ /'dir bdag cag gi 'dren pa dam pa bstan pa rin po che'i mnga' bdag gsung rab dgongs 'grel dang bcas pa ma lus pa'i bang mdzod/ rje btsun mkhyen rab kyi dbang phyug kun dga' bzang po pa zhes yongs su grags pa 'di nyid ni shes bya thams cad chags thogs med par mngon sum du gzigs pa'i ye shes kyi spyan mnyes par gdon mi za mod/ 'on kyang deng sang gi skye bo rnams kyi snang ngo dang mthun par tshul