[A:437]snang ba dang / 'ga' zhig gis log bsgrub shin tu 'jigs su rung ba ji snyed byas kyang / thugs la khong khro dang khon du 'dzin pa'i rnam pa cung zad kyang mi mnga' bar/ log sgrub byed pa po la lhag par thugs brtse bar snang ba'i phyir ro/ /rig pa 'dzin pa'i sdom pa nos pa'i tshul ni/ thog mar chos rje ye shes rgyal mtshan pa'i drung du/ rgyud sde bzhi'i dkyil 'khor du dbang bskur ba gsan nas/ rig 'dzin sngags kyi sdom pa rnam par dag pa dang ldan par mdzad pa yin te/ de la bla med kyi skor la/ gsang ba 'dus pa mi bskyod pa/ ye shes zhabs lugs/ gshin rje gshed dmar po lha lnga/ lha bcu gsum ma/ dpal kye rdo rje man ngag lugs/ bdag med ma/ gur rigs bsdus/ bde mchog lo nag dril gsum/ dril bu lha lnga/ sgrol ma lha bcu bdun ma/ dus kyi 'khor lo rnams kyi dbang gsan/ gzhan yang yo ga rdor dbyings/ 'jam dpal gsang ldan/ kun rig rtsa ba'i dbang rnams gsan/ bya spyod la tshe dpag lha dgu/ gzungs grwa lnga/ 'jam dbyangs a ra pa tsa na lha lnga rnams kyi dbang gsan no/ /gzhan yang bla ma so so'i drung du/ rgyud sde bzhi dang 'brel pa'i dbang bsam gyis mi khyab pa gsan nas/ rig 'dzin sngags kyi sdom pa la nyes pa'i dri mas ma gos par thugs rgyud la legs par bzhugs pa yin te/ dbang bskur phyin ci ma log par thob pa'i bla ma rdo rje 'chang dang dbyer mi phyed pa'i mos pa gzhan gyis dbrog par mi nus pa'i phyir ro/ /de ltar gzhi sdom pa gsum rnam par dag pa la brten nas/ gnyis pa thos bsam sogs ji ltar mdzad tshul ni/ dgung lo dgu pa la rab byung mdzad pa de nas bzung ste dgung lo nyi shu rtsa lnga pa'i bar du gtso cher chos rje ye shes rgyal mtshan pa'i drung du bzhugs te/ sngar gyi brtag gnyis ma bsnyel bar mdzad nas/ thog mar bcom ldan 'das dus kyi 'khor lo dang / yo ga rdor dbyings kyi phyag len rnams mthar phyin par mdzad do/ /gsang ba 'dus pa'i bshad rgyud dgongs pa