[A:435]nas/ brtag gnyis kyi mdzub khrid rnams rdzogs par mdzad do/ /rnam gzhag mdzad par skabs su bab pa na/ ta'i si tu bsod nams dpal bas nye gnas grub pa'i bu rnam gzhag byed pa'i ston shog gi dkar ru ma nged kyis byed pa yin gsungs nas shog bu rtse chen ma bong rgyab du ma'i dkar ru ma mdzad do/ /de la spyir rnam gzhag mdzad pa rnams kyis ston shog la shog yug phyed re 'bul ba yin yang chos rje rin po che pas ston shog la shog bu rtse chen ma re phul zhing de dang mthun pa'i de nas gzhan las phul du byung ba'i rnam gzhag dang dga' ston rgya chen po mdzad nas/ chos gsungs pas/ chos dang dga' ston gnyis ka la kun gyis ngo mtshar du 'dzin par gyur to/ /gnyis pa rab tu byung nas kyi rnam thar la gsum ste/ gzhi tshul khrims rnam par dag pa ji ltar nos pa'i tshul/ de la brten nas thos bsam la sogs pa ji ltar mdzad pa'i tshul/ gzhan don phrin las ji ltar mdzad pa'i tshul lo/ dang po la so sor thar pa'i sdom pa ji ltar nos pa'i tshul ni/ dgung lo dgu bzhes pa'i dus/ chos rje ye shes rgyal mtshan pas mkhan po mdzad/ chos rje sa bzang 'phags pa gzhon nu blo gros pas las kyi slob dpon dang / ka bzhi 'dzin pa dpal ldan seng ges grib tshod pa dang / bla ma kun dga' rin chen pa dang / mkhas pa'i dbang po g.yag ston sangs rgyas dpal gyis kha skong gi dge 'dun mdzad nas/ dge bsnyen dang dge tshul gyi sdom pa rnam par dag pa nos nas nyes byas phra zhing phra bas kyang ma gos par bsrung bar mdzad pa yin no/ /de ltar nyes pa phra bas ma gos pa de yang gzhan rkyen la brten pa'am/ rang gis kyang rtsol ba drag pos gnyen po bsten dgos pa ma yin par sngon bcom ldan 'das kyi spyan sngar dge slong 'ga' zhig tshur shog la sogs pas bsnyen par rdzogs pa na/ de ma thag tu bsnyen par rdzogs nas lo brgya lon pa lta bu'i spyod lam dang ldan par gyur to zhes pa dang tshul mtshungs par rab tu byung ma thag nas rang gi ngang gis nyes