[A:465] zhing khams ma'i sku la sogs pa ras bris kyi sogs shin tu ya mtshan che ba grangs med pa bzhengs pa dang / dge 'dun gyi 'du khang dang gtsug lag khang khyad par du 'phags pa bzhengs pa'i gtsang khang gi nang du/ yum nas bshad pa'i phyogs bcu'i sangs rgyas kyi lder sku la sogs khyad par du 'phags pa dang / logs ris la gser 'od nas gsungs pa'i phyogs bcu'i sangs rgyas la sangs rgyas dang byang chub sems dpa'i tshogs bsam gyis mi khyab pas bskor ba dang / 'du khang gi logs ris zhing khams nyi shu rtsa brgyad la dbus su ston pa bdud 'dul ma dang / chos mchad ma gnyis/ de dag gi g.yas g.yon na sman bla'i mdo brgyad brgya pa nas bshad pa'i de bzhin gshegs pa drug /nub phyogs kyi zhing khams dang po la sman pa'i rgyal po/ shar phyogs kyi dang po la bcom ldan 'das mi 'khrugs pa/ zhing khams lhag ma bcu la phyogs bcu mun sel nas bshad pa'i phyogs bcu'i sangs rgyas/ de dag gi bar rnams su bskal bzang nas bshad pa'i sangs rgyas stong la sogs pa sangs rgyas kyi sku rab tu mang po dang / shar nub kyi zhing khams bcu gnyis kyi dpung zur g.yas g.yon du rdo rje gdan gyi gtad rabs nyi shu rtsa bzhi/ phyogs bcu'i sangs rgyas kyi ldem la mdo dgongs pa nges 'grel nas bshad pa'i nyan thos nyi shu/ phyi'i sgo'i nang gi g.yas g.yon gyi zhing khams brgyad la/ byang chub sems dpa' nye ba'i sras brgyad/ ldem la spang skong phyag brgya pa nas bshad pa'i byang sems bcu drug /de rnams kyi bar dang 'og rnams su 'jam dpal rtsa rgyud nas bshad pa'i rang rgyal bcu drug /'dul ba lung nas bshad pa'i nyan thos brgya/ gzhan yang gnod sbyin gyi sde dpon la sogs bsam gyis mi khyab pa bzhengs so/ /de dag gi skabs su lha bzo ba la sogs pa'i bzo rigs pa rnams la yon rdzongs dang / ston mo dang / bskon dang / bskyon la sogs pas bsam pa legs par tshim par mdzad pa dang / gzhan yang rten rnams kyi na bza' dang / de dag gi spyan sngar mchod pa'i yo byad mar me'i phreng ba dang / chen po la 'os pa'i gdugs dang / rgyal mtshan dang / ba dan dang / dar dang / mu tig dang bcas pa'i 'phan gyi tshogs dang / dung dang sil snyan la sogs pa rol mo'i bye brag sna tshogs pa dang / khyad par du 'phags pa'i bla bre'i tshogs dang / rin po che dngul gyi maNDal la sogs pa maNDal gyi tshogs grangs med pa la sogs pa ste/ mdor na mchod pa'i bye brag bzang zhing ngo mtshar ba dpag tu med pa dang / bla ma gong ma rnams kyi dus mchod dang / gzhan yang skyid grong jo bo'i drung du mar me'i phreng ba khor yug mang po zla gcig gi bar du phul zhing / kha phyar jo bo'i drung du yang mar me'i phreng ba rab tu mang po zhag nyi shu rtsa lnga'i bar du phul la/ khyad par gdan sa chen po dpal ldan sa skya'i gtsug lag khang rnams su gser ga lngas gtso byas/ gser zho sum brgya tsam gyi rin gyi mar me rta lo cho 'phrul chen po'i tshes brgyad nas brtsams te/ nyer lnga'i bar du rgyun ma chad par phul nas sangs rgyas kyi bstan pa phyogs thams cad du yun ring rgyas pa'i smon lam rgya chen po mdzad do/ /de lta bu'i mdzad pa mtha' yas shing rmad du byung ba rgyun mi chad pa/ bde blag tu 'grub pa'i 'gal rkyen sel zhing mthun rkyen