[A:461]rjes gnang dang rigs gtad sgrub thabs dang lung la sogs pa'i chos kyi 'khor lo nyin mtshan khor yug tu rgyun mi 'chad par bskor bar mdzad do/ /de la brten nas sems dpa' chen po gzhon nu rgyal mchog pa dang / mkhyen rab dbang phyug grags pa bzang po dang / chos rje gzhon nu seng ge pa la sogs pa bstan pa la bya ba byas pa'i dge ba'i bshes gnyen chen po du ma dang / khyad par rgyud sde chen po bzhi'i don la bshad pa dang / lag len dang nyams len gyi rim pa thams cad 'khrul pa med par thugs su chud nas bshad nyan gyi sgo nas bstan pa'i rgyud gnas pa dang / nyams len gyi sgo nas bsgrub pa'i rgyal mtshan btsugs pa'i dge ba'i bshes gnyen 'jam pa'i dbyangs kyi rnam 'phrul dpal ldan sa skya pa'i gdung brgyud bdag chen chu mig pa grags pa blo gros pa dang / bdag chen mthu stobs dbang phyug bsod nams rgyal mtshan pa dang / bdag chen gzhi thog pa kun dga' dbang phyug pa dang / bdag chen chu mig pa blo gros dbang phyug pa rnams kyis gtso mdzad/ stod mnga' ris/ smad mdo khams/ bar dbus gtsang gi phyogs mtha' dag na bsam gyis mi khyab cing grangs las 'das pa bskrun par mdzad cing / chos rje rin po che rang nyid kyis thugs rgyud la yang / spyan lam na yod pa'i bum pa la sogs pa la rdul phra rab ji snyed yod pa gsal bar gzigs pa'i ting nge 'dzin la sogs pa'i ting nge 'dzin du ma la mnga' brnyes te/ de'i stobs kyis gdan sa chen po dang / gzhan yang sde pa 'ga' re la ma 'ongs pa na 'di lta bu 'byung ba dang / tha na gra pa phal pa 'gro 'dug byed pa'i lung bstan zhus pa yang ji ltar lung bstan pa ltar thog tu 'bab pa la sogs pa ma 'ongs pa lung bstan pa yang mtha' yas so/ /de lta bu'i bar skabs su mnga' ris glo bo phyogs nas bstan pa'i sbyin bdag a ma dpal yab sras kyis lan gsum gyi bar du gdan 'dren zhus pa/