[A:421]thos bsam sgom gsum gyi shes rab rgyas par mdzad pas/ mkhyen pa'i ye shes tshad med pa mnga' ba yin no/ /gzhan yang bdag cag gi bla ma thugs rje chen po 'di ni mnyam gzhag tu sems can thams cad drin can pha mar gzigs nas/ de rnams la byams pa dang / snying rje dang / bdag gzhan brje ba'i byang chub kyi sems rgyun ldan du bsgoms pas rjes thob tu gzhan dbul po dang / nad pa dang / sdug bsngal gyis gzir ba rnams la phan pa kho na sgrub par mdzad de/ yul gzhan thag ring por nad dang sdug bsngal gyis nyen pa gsan na/ de la dmigs te bdag gzhan mnyam brje'i byang sems mang po re mdzad la de tsam thugs long ma byung na yang brgya rtsa re mdzad pa srol du snang ngo / /de ltar byang chub kyi sems rgyun du sbyangs pas brtse ba'i thugs rje bsam gyis mi khyab pa'i yon tan mnga' ba yin no/ /gzhan yang 'gro ba mang po la zang zing gi sbyin pa'i sgo nas phan pa mdzad de/ rje nyid kyi yab hor yul du byon pas dngos po bsam gyis mi khyab pa yod kyang de dag la 'dzin pa cung zad kyang mi mnga' ba phal cher yab yum gnyis kyi don du rdzogs par mdzad cing / bar skabs su chud kha'i chab 'og tu mu ge byung ba'i tshe/ dngul bre chen cig gis thog drangs pa'i nang nor yongs su rdzogs pa chud kha sde pa la btsongs na rin gyi nas rnams kyis sems can bkres pas gzir ba rnams tshim par byas pa dang / bde bar mi gshegs pa'i lo gsum gyi gong du zhing gzhis gang yod rnams btsongs nas de dag gi cha rkyen rnams dge 'dun skye bo'i tshogs dang bcas pa rnams la phul nas mthar chos kyi sku mngon du mdzad pa na/ rdo rje dril bu dang nang mchod dang bcas pa'i mchod cha cung zad cig dang / snam sbyar/ lhung bzed/ na bza' nyung zad cig /bzhugs gdan dbu rten dang bcas pa cig ma gtogs gser se gcig gam/ nas khal gcig tu longs pa med par sbyin pa gtong ba yin/ bye brag tu ting nge 'dzin don du gnyer ba'i gang zag byung na zas gos kyi