[A:427]la khong nad thu mo cig yod pa la gcod kyi dmigs pa 'dra byed du bcug pas cher ma phan pa/ 'byung po cig gi bar chad yin pa 'dra/ gur mgon gyi rjes gnang cig zhus gsungs/ nyi shu dgu cig la zhus pas bka' bsgo byed pa'i dus su 'di'i bar chad zhi bar gyis gsungs pa'i tshe/ lus nyams byung ste rdo rje'i skyil krung du bzhugs bzhin pa la/ gtor ma phyag tu bzung nas 'phar te khong gi steng du 'phags pa byung / de kas nad gzhi de las grol lo/ /de la sogs pa ji ltar bka' bsgos pa bzhin du sgrub pa'i lo rgyus yang yang du snang ngo / /stag gi lo la da lo sa skyar 'gro/ da lan las mi sleb gsungs nas byon/ sa skya sa bzang gnyis su zla ba dgu bzhugs/ de'i tshe sgo rum du dpal rdo rje nag po chen po'i sku la shel rgyan dang na bza' dang gtor ma cod pan mang po phul nas gsol ba btab pas/ sa skya pa cung zad drag tu 'gro ba'i rten 'brel cig 'dug gsungs/ de'i tshe sde snod mtha' dag gi dbang phyug mkhas pa'i dbang po chos rje sangs rgyas dpal ba la sogs pa dge ba'i bshes gnyen mang pos dbang bka' dang khrid dang man ngag mang du zhus/ bdag gis kyang chos zhu 'phro thams cad rdzogs par mdzad nas/ nga sems bde gsungs nas ri khrod du byon no/ /yos lo nas lo gsum du sku mtshams dam par mdzad/ dge bshes gal chen re re tsam la 'dod chos sna re tsam gnang ba ma gtogs nyin mtshan khor yug tu ting nge 'dzin bsgoms pas rtogs pa bzang po 'khrungs so/ /rta lor bdag gis lo gcig tsam dbus la phyin na 'chi'am zhus pas/ khyod na ning nas kyang yang yang 'gro zer gyin 'dug na'ang / nged la chos rje dpal ldan tshul khrims kyis gnang ba'i gdams ngag 'di rnams khyod la rdzogs pa cig 'phrod na snyam pa de sngar ma tshar ba dang / chos rje 'phags pa pa'i sku tshe ji 'dra 'ong mi shes pas sdod byas pa yin/ da lan song dbus su lo bzhi 'gor bar 'dug /rten 'brel dga' mo cig byung bas bar chad mi 'ong / nga yang ma shi tsam dang 'phrad par 'dug gsungs nas sku mtshams sngar bas dam du btang / thugs dam la dril bas rdzogs rim gyi rtogs pa bsam gyis mi khyab pa thugs rgyud la 'khrungs