[A:426]ge gang ba yang dang po thang re re gnyis gnyis 'char ba byung / da dus phyis rtag tu 'ong gin 'dug stong gzugs su ni gda' gsungs/ glang lor lam 'bras gsung dus shig /man ngag 'di pa'i lugs kyi rjes thob tu ngo bo nyid gsum skyong tshul 'di zab mo rang cig 'dug /'di ka la dran 'dzin ma chad par byas tsa na dge sbyor dga' mo rang 'ong gin 'dug gsungs/ chos de grol rjes bdag gis rjes thob lam khyer ji ltar mdzad zhus pas/ ngas spros pa tsam ma byas par bsgoms pas/ da rjes thob tu grogs med gcig pur bsdad tsa na/ snang ba thams cad nyams snang 'ba' zhig tu 'char/ de las gzhan du sems mi g.yo ba cig 'ong / mi cig rtsar byung ba'am/ thug sgra sogs byung tsa na khang khyim sogs snang ba rang dga' ma 'di 'char/ yang cung zad nas nyams snang du 'gro ba cig byung / de lam 'bras pa'i ngo bo nyid gsum skyong tshul de ka la nyams len byas pa'i 'bras bur 'dug gsungs/ de la sogs pa rtogs pa'i yon tan bsam gyis mi khyab pa mnga' ba zhig go /yang bu cig bde mchog 'di lam khyad 'phags cig yin par 'dug /ngas chos rje dpaXl ldan pa las dril bu pa'i dbang thob nas ye ma chags par bsgoms/ nA ro mkha' spyod kyi byin rlabs zhus nas bsgom bzlas byas pas rdzogs rim gyi rtogs pa skye ba la phan par byung gsungs/ dam pa chos skyong ba'i srung ma rnams kyang ji ltar bsgo ba'i phrin las sgrub par snang ste/ dus cig zhi ba'i g.yag bdun rkun mas khyer 'dug pa/ de nub gtor ma bsngo ba'i skabs su mon bu pu tra g.yag ded pa ma shi ba cig gyis/ rkun ma rnams kyi srog la gnod pa ma skyel/ tsham rngam gyis la 'jigs su chug ces gsung skad chen pos lan gsum gsung gin snang / phyis zhag gsum song dus 'jigs med zer ba'i spyi ba cig 'dug pa de la/ chu 'og pa'i mi cig na re khyed kyi g.yag bor ba de nged kha cig gis rnyed yod pas 'bul zer/ gtam mang du byas pas bla ma'i byin rlabs dang chos skyong gi gtor dbang dgos/ phyis chos skyong gi gnod pa mi 'ong pa'i srung 'khor dgos zer nas g.yag bdun ka bskyal song / cho 'phrul 'ga' zhig byung bar snang ngo / /dbon po shes rab seng ge