[A:398]gsungs pas de'i ltas su 'dug gsungs pa dang / de'i dus su stod lung nas dge bshes shes rab rdo rje bya bas grogs po mang po dang bcas pa chos rje'i drung du mjal du 'ong pas/ chos rje nyan po chos khri'i kha na bzhugs pa rgyang ring po nas 'jam pa'i dbyangs nyid 'od zer dang bcas nas chos gsungs pa mngon sum du mthong bas/ rang dbang med pa dad pas lag pa'i sor mo rnams bcad de maNDal du bkod nas phul kyang de la ljags chab btab byin rlabs mdzad pas rjes mi mngon pa sor mo sos pa byung ba la sogs pa'i dag pa'i snang ba dang byin rlabs dang nus pa du ma thob pa byung ngo / /gnyis pa lhag pa shes rab kyi bslab pa ni/ rang gzhan gyi grub pa'i mtha' rgya mtsho lta bu'i pha rol du son cing bden gnyis dbyer med kyi gnas lugs de kho na nyid rtogs te/ kun rdzob 'khor 'das kyi chos thams cad kyi rten cing 'brel par 'byung ba'i rgyu rkyen la yid ches shing thabs la mkhas pas rgyu lam 'bras bu'i blang dor gyi cha la ma rmongs kyang kun rdzob de nyid don dam par skye 'gag gnas gsum dang bral ba'i dbyings rang bzhin gyis stong pa nyid bden gnyis dbyer med chu nang gi zla ba dang / lkugs pa'i rmi lam bzhin brjod bral du sgro 'dogs chod pas/ gnas lugs phyin ci ma log par rtogs pa'i shes rab kyi 'chad rtsod rtsom pa'i tshul ches phul du byung bas shes bya'i dkyil 'khor la mi 'phrogs pa'i mkhyen rab tshad med pa mnga'o/ /gsum pa lhag pa ting nge 'dzin gyi bslab pa ni/ kun rdzob kyi bden pa zag bcas zag med du gnas gyur pa'i cha dang / don dam chos nyid rtog bcas rtog med du mngon du gyur pa'i cha dang / spangs rtogs kyi ye shes mngon du gyur pa'i yon tan kyang bsam gyis mi khyab pa mnga' ba rnams ni gzhan gyis tshad bzung bar mi rung bas shes par mi nus so/ /cung zad brjod na dbang bzhi'i ye shes ting nge 'dzin gyi sgo bsam gyis mi khyab pa la mnga' 'byor pa'i rtags ni/ dbus su dus