[A:༡༧༧བ]ཡུག་རིགས་པའི་སེང་གེ་དང་། ཞང་བཙུན་མདོ་སྡེ་དཔལ་དང་། ཤར་པ་ཤེས་འབྱུང་སོགས་ཏེ། མདོར་ན་ཁང་གཉན་ཞང་གསུམ། ཤར་ནུབ་གུང་གསུམ་ལ་སོགས་པ་དང་། མན་ངག་གི་བཀའ་བབ་པ་དམར་སྟོན་ཆོས་ཀྱི་རྒྱལ་པོ་དང་། ལྷོ་པ་ཀུན་མཁྱེན་དཔལ་ལ་སོགས་པ་དང་། རྟོགས་པའི་བཀའ་བབ་པ་ཚོགས་སྒོམ། ཉན་ཆེན། གྲུབ་ཐོབ་ཡོན་ཏན་དཔལ་ལ་སོགས་ཏེ། མདོར་ན་མཁས་གྲུབ་ཀྱི་བུ་ཆེན་བགྲང་བ་ལས་འདས་པ་བཤད་སྒྲུབ་ལ་བཀོད་དོ། །རྩོམ་པ་ནི། སྒྲ་དང་སྙན་ངག་དང་མིང་གི་མངོན་བརྗོད་ལ་སོགས་པའི་བསྟན་བཅོས་དུ་མ་དང་། རིག་པའི་ཕྱོགས་ལ་སྡེ་བདུན་མདོ་དང་བཅས་པའི་དོན་རྫོགས་པར་སྟོན་པ་རིགས་གཏེར་རྩ་འགྲེལ། ལུང་གི་ཕྱོགས་ལ་མདོ་སྡེ་རྒྱན་གྱི་དོན་འགྲེལ་དུ་བྱས་ནས་ཆོས་མཐའ་དག་འདུས་པ་ཐུབ་པ་དགོངས་གསལ་ལ་སོགས་ཏེ། མདོར་ན་མདོ་སྔགས་ལུང་རིགས་ཐམས་ཅད་ཀྱི་ཚིག་དོན་ཉུང་ངུས་འདུས་པ་མཁས་པའི་ཡིད་འཕྲོག་ཅིང་།