[A:༦༦བ] གྲུབ་མཐའ་སྤོངས་དགོས་པ་བྱུང་བ་རྣམས་ལའང་ཕན་བཏགས། མ་ཙ་ལ་སརྟི་ཀ་ཞེས་བྱ་བའི་རྒྱལ་པོ་དཔུང་འཁོར་གསུམ་འབུམ་གྱི་སྟོབས་ཡོད་པས། རང་ཉིད་ཀྱི་སྦྱིན་བདག་ཏུ་གྱུར་པའི་རྒྱལ་པོ་བཅོམ་པར་བརྩམས་པའི་ཚེ། སློབ་དཔོན་གྱིས་ཆོས་སྐྱོང་ལ་གསོལ་བ་བཏབ་ཅིང་ལས་བཅོལ་བས། མགོན་པོ་འདི་ཉིད་དངོས་སུ་བྱོན་ནས་མིང་མེད་པར་བཏུལ། གཞན་ཡང་ཀྱེ་རྡོ་རྗེའི་ལས་ཀྱི་ཚོགས་རབ་འབྱམས་རྣམས་ཐོགས་པ་མེད་པར་གྲུབ་ཅིང་། དེས་བསྟན་པ་ལ་ཕན་པར་མཛད་པས། ཀུན་གྱིས་བྲམ་ཟེ་མཆོག་སྲེད་ཅེས་པར་མཚན་གྲགས་སོ། །དེ་ནས་ཡི་དམ་ཀྱེ་རྡོ་རྗེ་དང་འཁོར་ལོ་བདེ་མཆོག་ལ་སོགས་པ་རྒྱུན་དུ་ཞལ་གཟིགས་ཤིང་། རྣལ་འབྱོར་བཞིས་མཆོག་དང་ཐུན་མོང་གི་གྲུབ་པ་ཐོབ་སྟེ། ཡུལ་ཉི་ཤུ་རྩ་བཞི་ལ་སོགས་པར་སྤྱོད་པ་གྱིས་ཤིག ཅེས་ཨུ་རྒྱན་དུ་རྣལ་འབྱོར་མས་ལུང་བསྟན་ཏེ་སྤྱོད་པ་མཛད། དེ་ནས་དུས་བཟང་ལ་རྡོ་རྗེ་གདན་གྱི་མགོན་ཁང་དུ་ལོ་མང་པོའི་བར་དུ་