[A:8a]yin pas rol mo'i sgra skad las/ 'chi med mya ngan med par sangs rgyas nas/ /skom pas rab gdungs bdud rtsis tshim bya zhes/ /sngon gyi smon lam tshig mchog dran bgyis la/ /grong khyer 'di nas myur du mngon par 'byung / /zhes sogs bskul ba gsan zhing / phyogs bzhir rga ba dang na ba dang 'chi ba dang dge slong gi dngos po gzigs nas khyim la skyo bar bstan/ rab tu byung ba'i phyir thabs kyis yab la gnang ba zhus nas lha rnams kyis grogs bgyis te bsngags ldan la chibs te ser skya'i yul nas shar phyogs su dpag tshad bcu gnyis 'das pa spong byed kyi yul chu klung yid 'ong ldan gyi 'gram du slebs/ rta dang na bza' 'dun pa dang bcas slogs shing / rga 'chi med pa'i gnas mchog 'chi med pa/ /'chi med byang chub dam pa ma thob par/ /nga ni ser skya'i grong khyer mngon phyogs te/ /'greng 'dug nyal dang 'chag par mi bya'o/ /zhes gsungs/ nyid kyi dbu skra nyid kyis bcad/ ngur smrig bzhes te rab byung gis bsnyen par rdzogs so/ /rtog ge ba gdam ngag che bar grags pa sgyu rtsal shes kyi bu ring 'phur dang / rengs byed kyi bu lhag spyod las ci yang med dang srid rtse'i snyoms 'jug gi ting nge 'dzin mngon sum du mdzad do/ /'dis nges par mi 'byung ngo zhes sun phyung nas/ de dag gi 'khor lnga sde dang 'grogs nas chu klung nai ranydzya na'i 'gram du phyin te zas skom bcad mkha' khyab kyi ting nge 'dzin la snyoms par bzhugs te dka' ba lo drug spyad do/ /sku'i mdangs nag po dang rid par gyur pas dge sbyong nag po zhes smreng ngo / /de nas de bzhin gshegs pa rnams kyis se gol gyi sgras bslang ste mi g.yo ba'i ting nge 'dzin de bskyur nas grong pa'i bu mo legs skyes mas phul ba'i 'o thug sbrang rtsi'i snying po can gsol bas sku gser gyi gtan pa phyis pa ltar gsos shing / rgyud las/ de'i tshe rnam smin gyi lus de nyid du bzhag nas ye shes kyi lus 'og min gyi lha'i khang bzang du gshegs nas/ de bzhin gshegs pa til gyi gang bu tsam du de gang bar 'dus pa la rdo rje dbyings kyi dbang nod de mngon par rdzogs par sangs rgyas nas/ slar sprul pa'i sku de la zhugs nas 'tshang rgya ba'i tshul bstan pas/ yang dag sangs rgyas der sangs rgyas/ /sprul pa po cig 'dir sangs rgya/ /zhes gsungs/ lang gshegs las kyang / 'dod pa'i khams dang gzugs med du/ /sangs rgyas mngon par sangs mi rgya/ /gzugs kyi khams kyi 'og min du/ /