[A:9a]'dod chags bral khyod sangs rgya'o/ /zhes gsungs pa theg pa che chung gi khyad du zad do/ /de nas byang chub sems dpa' sa ga'i nya la chos kyi g.ye'i dgon pa ma ga dha rdo rje'i gdan byang chub kyi snying po'i spo a shwa ttha'i byang chub kyi shing drung du gshegs pa'i tshe klu chen nag pos mig thob pas sangs rgyas su 'gyur bar shes la/ lam du rtswa tshong bkra shis la/ bkra shis nga la rtswa zhig myur du sbyin/ /de ring nga la rtswa yis don chen 'gyur/ /dpung dang bcas pa'i bdud ni bcom nas su/ /byang chub zhi ba dam pa thob par 'gyur/ /zhes gsungs nas rma bya'i mgrin pa'i spu lta bu'i rtswa spar gang blangs nas byang chub kyi snying por byang chub kyi shing stong byung zhing / sengge'i khri stong byung ba'i gsum la bskor ba mdzad bzhi pa la bzhugs so/ /lnga sde ni 'dis dka' ba spyod pa las nyams so snyam nas de spangs te ka shi'i yul drang srong lhung ba ri dwags kyi nags su song ngo / /rtswa'i gdan de la bzhugs nas/ gdan 'dir bdag gi lus 'di skam pa'am/ /pags pa rus pa'i tshogs rnams zhig gyur kyang / /bskal mang rnyed dka'i byang chub ma thob bar/ /stan 'di las ni lus bskyod mi bya'o/ /zhes dam bca' mdzad do/ /de nas srod la bdud las ma rgyal bar bdag 'tshang rgya bar mi rigs so snyam nas smin mtshams nas bdud kyi dkyil 'khor 'joms pa'i 'od bkye bas stong gsum khyab par mdzad pa las/ sems can dag pa bskal mang spyad spyod pa/ /zas gtsang sras po rgyal srid rab spangs te/ /phan byed bdud rtsi mngon par 'dod pas byung / /shing drung 'ongs kyi de ring sgrim par gyis/ /zhes bya ba 'byung ba dang / sdig can la rmi lam ngan pa sum cu rtsa gnyis byung nas bdud kyi dmag dkrigs phrag bcu 'dus te/ gnod sbyin grul bum dang ni lto 'phye'i gzugs/ /srin po'i gzugs dang sha za yi dwags gzugs/ /'jig rten mi sdug drag gzugs ji snyed pa/ /thams cad rgyu yis de ni sprul pa byas/ /zhes dang / phyogs rnams kun nas ri yi phreng ba dang / /mkha' las brag dang mtshon gyi char pa dang / /rdo rje 'bar ba mngon par phab pa yis/ /shAkya'i bu de thal bar brlag par bya/ /zhes 'jigs 'jigs su smra'o/ /shAkya'i rgyal po rten cing 'brel 'byung chos/ /dngos po med pa'i ngo bo nyid rtogs te/ /nam mkha' lta bu'i sems dang rab ldan pas/ /g.yo can dpung tshogs dag gis brdzi ba med/ /ces byang chub sems