[A:7a]tshal du yum gyi rtsib logs g.yas nas yum la gnod pa med par btsas te/ tshangs pa dang brgya byin gyis ka shi ka'i ras kyis blangs/ klus khrus gsol ba dang / phyogs rnams su gom pa bdun bdun bor nas sengge'i sgra bsgrags so/ /de'i tshe bkra shis pa'i dge ltas sum cu rtsa gnyis byung ste/ phyogs thams cad gser 'od kyi snang bas gtams pa dang / yul chen po bzhir rgyal phran bzhi btsas pa dang / ya rabs kyi mi lnga brgya/ grags 'dzin ma sogs bu mo brgyad brgya/ 'dun pa sogs bran lnga brgya/ bsngags ldan sogs rte'u khri/ rte'u mo khri/ ba glang khri/ gling gi dbus su byang chub kyi shing / skyed tshal lnga brgya dang / gter lnga brgya'ang byung bas rgyal po'i don thams cad grub pas sras kyi mtshan don thams cad grub pa zhes bya bar btags so/ /ltas mkhan rnams kyis khyim na gnas na mtha' bzhi las rnam par rgyal ba'i 'khor los bsgyur ba dang / khyim nas khyim med par rab tu byung na sangs rgyas su 'gyur bar lung bstan to/ /zhag bdun na yum tshe'i dus byas/ skye dgu'i bdag mo la sogs pa'i ma ma sum cu rtsa gnyis la gtad nas skyed bsrings te/ de nas ser skya'i gzhir byon pa na shAkya gzu lum can rnams thub pa bzhin gnas pas shAkya thub pa dang / shAkya rnams kyi lha gnod sbyin shAkya 'phel la sogs pas phyag byas pas lha'i yang lha dang / glang po che stong thub ces pas mtshan bzhi thogs so/ /kun gyi bshes gnyen dang / srid sgrub dang / zhang po lhar bcas sogs las yi ge dang / rtsis dang / sgyu rtsal dang / 'phong la sogs pa 'jig rten pas bslab pa'i gnas slob pa'i grwar byon thams cad la slob dpon bas lhag par bstan to/ /khab bzhes par zhus pas sngar ma gnang zhing nan gyis gsol bas/ ljan ljin 'dam gyi khrod nas padma rnam par rgyas/ /mi rnams gang ba'i nang nas rgyal po mchod pa thob/ /sngon chad rgyal ba rnams kyang btsun mo'i 'khor nas ni/ /mngon par byung nas zhi ba thob pa yin snyam dgongs/ /zhal gyis bzhes te btsun mo'i phyir du shAkya lag na be con can gyi bu mo grags 'dzin ma rgyal ba'i ru mtshon du bzhag nas dgung lo bcu bdun pa la bzo'i gnas la thams cad las rnam par rgyal bar bstan nas/ sbed ma/ ri dwags skyes te btsun mo'i gtso mo gsum 'khor bud med bzang mo drug khri dang bcas pa bsus/ dgung lo nyi shu rtsa dgu'i bar du rtse dgas rol to/ /de la phyogs bcu'i rgyal ba kun gyis bskul ba chos nyid