[A:6a]gnas la mkhas pa dang / /btsun mo'i 'khor gyis rol ba dang / /nges 'byung dka' ba spyad pa dang / /byang chub snying por gshegs pa dang / /bdud sde bcom dang rdzogs par ni/ /byang chub chos kyi 'khor lo bskor/ /mya ngan 'da' bar gshegs mdzad rnams/ /zhes pa'i mdzad pa dang po ni 'od srung dga' ldan nas 'pho ba'i dus rgyal tshab tu dbang bskur ba dam pa tog dkar po lha rnams la chos ston pa'i mthar/ de la nyid kyi bsod nams kyi mthu dang sangs rgyas kyi byin rlabs kyis lha'i rol mo dag las/ bsod nams rgya chen tshogs mnga' dran rtogs shing / /blo gros mtha' yas shes rab 'od mdzad pa/ /mtshungs med stobs mnga' sgyu rtsal rgya che ba/ /mar me mdzad kyi lung bstan dgongs par mdzod/ /ces pa la sogs pas bskul bas rin po che'i cod pan ma pham pa'i dbu la bcings nas/ grogs po dag kho bo ni 'dzam bu'i gling du sangs rgyar 'gro ste/ khyed la ma pham pas chos ston par 'gyur ro/ /zhes rgyal tshab tu bkod/ lha'i 'khor rnams kyis 'dzam bu'i gling deng sang rtog ge ba drug gsum bco brgyad kyis ma rungs par bgyis pas gshegs pa'i skabs ma lags so zhes gsol ba la/ nyi ma'i 'od kyis 'od gzhan ltar zil gyis gnon par nus so zhes gsungs nas/ bram ze'i rig byed nas byung ba ltar glang po chen po'i rnam par babs nas/ dgun 'das nas dpyid zla tha chung skar ma sa ga la bab pa'i tshes bco lnga zla ba nya skar ma rgyal gyi dus su yum gso sbyong la gnas pa'i glo g.yas pa nas yum gyi lhums su zhugs pa ste/ ji skad du/ gser gyi dra bas legs g.yogs spyi gtsug dmar/ /thal dkar mche ba drug dang rab ldan zhing / /dung dang kha ba dngul mdog lta bu yi/ /glang po'i mchog cig khong du song snyam byed/ /de zhugs nas ni bdag gi lus dang sems/ /sngon chad mthong thos myong bar ma gyur pa'i/ /gya nom bde bas shin tu bde gyur te/ /bsam gtan mnyam par bzhag pa bzhin du gyur/ /ces so/ /de nas lhums der rgyal sras rnams kyis nye bar spyad pa rin po che'i bkod pa zhes bya ba'i gzhal med khang rang byung bar zla ba bcu gnyis lha dang mi khrag khrig phrag sum cu rtsa drug smin par mdzad do/ /de nas 'dul ba gzhung dam pa las/ bcom ldan 'das la khyim bdag mgon med zas sbyin gyis/ bcom ldan 'das zla ba gang la btsas zhes zhu ba dang / bcom ldan 'das kyis khyim bdag dpyid zla tha chung la btsas so/ /zhes gsungs pas sa ga'i nya la lumbi ni'i