[A:72a]de bas khyed cag gis ston pa de nyid dang de'i gsung rab la mchod par bya'o/ /zhes gsungs/ de gnyis kyis mchog bslangs pas nyi zla dang mnyam pa'i tshe sbyin no/ /de nas rang gi yul du log ste rig byed kyi chos rtswa ltar dor nas/ khyim gyi longs spyod thams cad bgos te gcen gyis shA ri'i bu 'khrungs sar nA lendra btab/ gcung gis rdo rje gdan byang chub chen po dang bcas pa bzhengs nas mched gnyis ston pa'i sras po sgra gcan 'dzin la rab tu byung ste/ gcen la sgra gcan 'dzin bzang po/ gcung la bIrYa bha dra zhes btags te sde snod gsum par gyur to/ /de dag theg pa dman pa'i sde snod las khyad par du 'phags pa'i chos shig 'dod pa la mtshan nyid kyi theg pa dang / de las kyang ches lhag pa zhig 'dod pa la/ mkhan pos gcen la gsang ba 'dus pa'i dkyil 'khor sprul nas de nyid du dbang bskur rgyud bshad man ngag gdams te/ gzhan yang gsang sngags du ma gsungs so/ /de ltar mched gnyis kyis so sos bzhengs pa'i gtsug lag khang du bzhugs te phyi ltar nyan thos kyi bstan pa legs par bskyangs la/ nang du rdo rje theg pa'i rnal 'byor la goms par mdzad de lo lnga brgyar nye ba tsam gnas la/ sgra gcan 'dzin gyis klu sgrub rab tu byung bas gdam ngag thams cad byin/ sangs rgyas thod pa'i 'grel pa sogs mdzad/ klu sgrub la nA lendra gtad de/ klu las gyur ba'i rnal 'byor ma gdol pa'i cha byad can gyis rjes su bzung lhan cig gnas pas/ thams cad kyis bram ze'i rigs dang / gnas brtan rgyal tshab chen po'i tshul las nyams so zhes skur pa btab pa na mda' srong ba'i tshul gyis dmangs/ btsun mo/ rgyal po rnams la rim pa bzhin/ do ha skor gsum glur blangs te dpal gyi ri la gshegs nas da lta'i bar du'ang bzhugs so/ /de'i gcung po ni rdo rje gdan du bzhugs pa'i tshe lha 'dre bran du khol gyin mchod rdzas bsags te tshogs 'khor dang rdo rje gdan la mchod pa mdzad/ de'i tshe rdo rje gdan gyi mi rnams kyi bsam pa la yul gzhan gyi mi rnams mchod pa byed pa la 'ongs ba yin bsam pa las mi ma yin du mi shes skad/ rdo rje gdan gyi nye 'khor na khrus byed pa'i rdzing dgun stong pa dbyar chus gang ba zhig gi nang du sgom gin bzhugs tshe/ glo bur du chus gang 'dug slob dpon gzhan du bzhud do sems/ de chu'i ting nge 'dzin la mnyam par