[A:71a]lo sum brgya na byon zhes 'chad/ de sgra gcan 'dzin gyi mkhan por bshad pas phyis skyon yod la/ rdo rje gdan pa'i gsung rgyun las/ de yang dbus 'gyur shar wA rA Na sI'i char gtogs pa gser gyi bre zhes bya ba'i grong du/ bram ze las drug la mngon par dga' ba'i rigs su tho btsun grub rje'am mkhas pa dang / bde byed bdag po'am yang dag rgyal ba can zhes bya ba gnyis skyes/ de gnyis kyis bstan bcos thams cad rtogs par gyur pa dang / 'di snyam du bdag cag gi khyim na ni dbang phyug chen po mchod la/ sangs rgyas bcom ldan 'das kyi gsung rab ni shin tu phul du byung bar snang na/ yu bu cag gi dbang phyug chen po khyad par du 'phags pa yin nam/ 'on te sangs rgyas bcom ldan 'das khyad par du 'phags pa nges par brtag par bya'o/ /de la ri ti se na dbang phyug chen po dang u ma mngon sum du gnas so zhes thos kyi/ der song la dri'o zhes bgros nas/ der 'bad pa chen po dang bcas te 'gro bar chas te/ lha dag gis grogs byas pas myur bar phyin te/ lha chen po'i bzhon pa khyu mchog sprin dkar po'i dum bu lta bu bzas la yan pa mthong ngo / /de mthong bas rab tu dga' ba dang / de'i rjes thogs nyid la lha mo u ma nags tshal na 'bras bu 'thu ba mthong nas gus pa dang bcas pas phyag byas te me tog rgyas pa'i nags tshal gyi gnas nas yu bu cag gi rje bo gnas so zhes thos nye bar son pa na/ lha chen po 'khor stong gi tshogs kyis bskor ba mthong ngo / /der tshogs kyi bdag pos lag pa nas bzung ste de'i thad du khyer te gus pas phyag byas so/ /dbang phyug gis khyed cag gang nas 'ong zhes dris pa dang / ji ltar gyur pa smras so/ /de nas dge slong rnams kyi zas kyi dus la bab pa na ma dros pa'i mtsho la gnas pa'i dgra bcom pa lnga brgya der byon te/ de la lha chen po yab yum 'khor dang bcas pas yo byad thams cad bstabs te zas zos zin pa dang / de dag las chos nyan/ de rnams log go /de'i tshe dbang phyug gis bram ze spun gnyis la/ gang gi slob ma bdag cag nyin re dga' bas mchod byed yon tan dam pa ldan/ /'jig rten nyes sel yon tan chen po'i mtshan gyi mchog ni rab tu grags gyur cing / /shin tu dga' ba'i yid kyis yang dag mchod byed tshe na mya ngan 'das 'drar sems/ /'jig rten gsum gyi bla ma yon tan mnyam med sangs rgyas de ni mkhas pas mchod/ /