[A:73a]bzhag pa yin/ yang mtsho bskams 'dag pa khal le slob dpon bzhugs pa mthong nas ngo mtshar bar gyur te/ der mtshan tyA yi pa zhes grags so/ /de nyin bzhin khyi mo brgya'i dbus su bzhugs/ mtshan bzhin khyi mo de dag phyag rgya la bzhes pa las khyi'i slob dpon ku ku ra tsa zhes kyang grags te/ u rgyan nas mahA ma ya'i rgyud spyan drangs la chos bdun du grags pa'i drug mdzad/ rnal 'byor pa brgyad kyi yab ku ku ri pa de yin/ rgyal po dza'i bla ma'o/ /gcen gyi slob ma'i gtso bo slob dpon klu sgrub yin/ de sngags lugs la ni phyag rgya chen po mchog gi dngos grub grub par 'dod la/ des gsang 'dus la sogs pa sbyin pa'i slob ma'i mchog bzhi las/ shAkya bshes gnyen gyis rim pa gsum pa mdzad/ ArYa de was spyod bsdus/ zla ba grags pas sgron gsal sogs/ klu'i byang chub ni slob dpon klu sgrub kyis ma he'i rdzi bo rgas 'khogs pa zhig snod ldan du gzigs nas/ gang gsal dris pas ma he'o/ /der ma he sgom du bcug pas ma he'i ra phug la zug pa dang / bcad pas med par song ba byung nas gdam ngag sbyin te dus las 'das pa bram ze'i rigs su 'khrungs pa slob dpon las rab tu byung ste/ mtshan nA ga bo dhi klu'i byang chub tu grags/ phyi nang gi grub mtha' thams cad mkhyen pa yi dam lha'i zhal gzigs nas dkyil 'khor gyi cho ga nyi shu pa la sogs pa mdzad/ b.ratal zhugs kyi spyod pa la zhugs pas mtshan ma tam kir grags te da lta yang dpal gyi ri la bzhugs so zhes grags so/ /yang slob dpon klu sgrub dang / dpal sa ra has rjes su bzung ba ni/ sha ba ri ste/ slob dpon klu sgrub bhangga la'i ri bo'i dgon pa na bzhugs pa'i tshe/ grong khyer te te na gar mkhan bza' mi lo ki dang gu na gnyis kyi bu tsha glu gar gyis 'tsho ba ming sring gsum 'ongs te glu gar phul bas/ rigs ngan la rnam rtog ma mdzad par nang du bos kha zas mang po byin pa dang / dad pa rnyed cing der byang chub sems dpa' blo gros rin chen gyi sku 'dra ras bris la bris pa mthong nas 'di ci lags zhus pas/ 'di byang sems tha mal pas mi mthong ba zhig yin gsungs/ bdag cag la bstan par zhu byas pas/ nga'i spyi gtsug na yod kyi ltos shig gsungs/