[A:5a]bcas pa dang / ston pas zhabs bzhag ste dge slong dag khyed kyis khye'u 'di'i skra la rdog pa ma 'jog cig de ci'i phyir zhe na/ 'di ni lha dang bcas pa'i mchod gnas yin te ma 'ongs pa'i dus su shAkya thub pa zhes bya bar 'gyur ro/ /zhes lung bstan pas dga' ches te ta la bdun srid gcig 'phags nas ting nge 'dzin brgya stong yang mngon du byas so/ /des sa brgyad pa thob ste/ sangs rgyas mar me mdzad la utpal lngas/ /gtor nas ral pa stan du bting byas pas/ /mi skye'i chos la bzod pa thob gyur nas/ /shAkya'i rgyal por 'gyur ces nga lung bstan/ /zhes gsungs so/ /de nas rnam par gzigs mchod pa'i bar gyis grangs med gsum rdzogs te sa bcu rdzogs pa yin te/ rnam gzigs mar me rin chen gtsug /grangs med gsum gyi tha mar byung / /dang po shAkya thub pa yin/ /zhes so/ /nyan thos dag de thams cad tshogs lam du 'da' bar 'dod de/ ston dang bse ru byang chub par/ /bsam gtan mtha' rten gcig la kun/ /zhes ston pa dang rang sangs rgyas sbyor lam drod thob pa'i rten las skad cig ma sum cu rtsa bzhis byang chub thob par 'dod pas so/ /grangs med 'dzin pa'i sa mtshams kyang theg bsdus las/ bzang dang smon pa'i stobs can dang / /sems brtan khyad par 'gro ba yis/ /byang chub sems dpa' grangs med gsum/ /kun tu rtsom par mdzad pa yin/ /zhes dang / dkon mchog sprin las/ nam byang chub sems dpa' chos mnyam pa nyid du zhugs par gyur pa de'i tshe de nas brtsams te bskal pa bgrang bar bya'i/ thog ma'i sems bskyed pa na brtsams te de ni ma yin no/ /zhes gsungs so/ /bzang ba dge ba'i rtsa ba stobs can dang / smon lam gyi stobs can dang / sems brtan te bar ma dor mi ldog pa dang / khyad par du 'gro ba ste yon tan cung zad kyis chog par mi 'dzin pa nam byung nas sangs rgya ba'i bar la grangs med gsum brtsam mo/ /bsag par bya ba'i tshogs kyang bsod nams dang ye shes kyi tshogs te pha rol tu phyin pa drug tu phye ba'o/ /'o skol gyi ston pa sangs rgya ba myur ba yin la gzhan grangs med sum cu rtsa gnyis dang / smon lam ci tsam rdzogs pa'i bar 'byams klas pa ste 'jam pa'i dbyangs dang kun tu bzang po bzhin no/ /tha ma sangs rgyas pa'i tshul ni rgyud bla mar/ skye ba mngon par skye ba dang / /dga' ldan gnas nas 'pho ba dang / /lhums su 'jug dang bltams pa dang / /bzo yi