[A:58a]gyi mdog can mdzes pa zhig rmis te shar phyogs kha sarpa Nir song zhig ces lung bstan no/ /sang de der song nas zhag gsum du smyung gnas byas te rmi lam brtags pas tho rangs steng gi nam mkha' la sprin phung 'thug po zhig gi gseb na lha mang po lus stod sprin gyi gseb nas phyung nas mchod rdzas sna tshogs kyis mchod pa mthong ste/ ci byed dris pas/ rje btsun byams pa brgyad stong pa gsungs pa la mchod pa byed pa yin zer/ ring du bltas pas rje btsun gser gyi mdog can spyi gtsug mchod rten gyis spras pa/ phyag g.yas chos 'chad kyi phyag rgya mdzad pa zhig mthong nas phyag dang mchod pa byas te nyid kyi bstan bcos 'di la 'grel pa mang du mchis kyang mi mthun na gang gi rjes su 'jug par bgyi zhes zhus pas/ thams cad kyi gzhung legs par brtags la 'thad pa bsdus te khyod kyis phyogs gcig tu rtsoms shig ces gnang ba byin no/ /sang de bstan bcos rtsom pa'i sbyin bdag btsal ba'i phyir shar nas nub tu byon pas rgyal po chos skyong gis yum 'chad pa slob dpon sengge bzang po mkhas par thos nas gdan 'dren du btang ba'i pho nya dang phrad nas gdan drangs te 'phags pa'i 'grel pa dang mthun pa nyi khri'i bsdus don le brgyad ma dang / brgyad stong 'grel chen dang / don gsal dang / sdud 'grel rtogs sla ba sogs mdzad do/ /de ltar yang brgyad stong 'grel chen gyi gsham du dpal ldan chos skyong gis sbyin bdag byas nas trI ka Tu ka zhes pa tsha ba gsum gyi gtsug lag khang du byas par bshad do/ /de'i rgyu mtshan rgya gar shar phyogs der mu stegs dar bas/ sgrol ma grub pa'i rnal 'byor pa zhig gis mu stegs kyi rten rnams bshig par 'dod nas sgrol ma la gsol ba btab pas/ rgyal po ma hi pA la la zhus zhes lung bstan/ rgyal po la zhus pas/ dmag thams cad bsdus nas bar du 'gro ba'i lam du mi nag po zhig 'dug pa na re/ nga mgon po mahA kA la yin/ bye ma'i phung po 'di'i 'og na sangs rgyas 'od srung gi gtsug lag khang zhig yod pa 'di sol/ mu stegs kyi rten bshig pa'i dus su dmag thams cad kyi khrims su bca' ba gyis la rol mo dus gcig tu khrol cig dang / ngas grogs bya'o zer te mi snang bar song / de'i bye ma bsal bas gtsug lag khang byung ba de yin/ de nas mu stegs kyi lha rten bshig pa'i dus kyang des bstan pa bzhin byas pas/ mu stegs nyams sangs rgyas kyi bstan pa