[A:57a]na klu'i rgyal pos blangs te zos pas/ klu'i rgyal po rgya mtsho dbang du gyur nas rgyal por brdzus te btsun mo'i rtsar 'ong zhing 'dod pa spyod pa las ci zhig na sbrum pa na rang gi sor gdub gtad de dus la babs pa dang btsas so/ /rgyal po khros pa dang sor gdub bstan pas klu'i yi ge mthong nas de wa bA la zhes btags te gces par bskyed bsrings so/ /de rgyal srid thob pa dang lha khang gzhan las khyad par du 'phags pa zhig rtsig par 'dod nas ltas mkhan la dris pas/ dge sbyong dang bram ze'i khyim nas ras blangs te sdong bu byas/ rgyal po dang tshong dpon gyi khyim nas mar/ dka' thub pa'i lha gnas nas kong bu blangs te mar me spor la yi dam gyi mdun du bzhag gsol ba btab na chos skyong gi sprul pas kong bu bskyur bar 'gyur la/ der rtsigs shig ces bsgo/ de ltar byas pas bya rog gcig byung nas kong bu mtsho la bskyur bas yi chad pa na/ mtshan mo klu'i rgyal po sbrul mgo lnga pa zhig byung nas/ nga khyod kyi pha yin pas mtsho bskams la rtsig tu bcug go /zhag bdun bdun na mchod pa chen po gyis shig zer/ de bzhin byas pas zhag nyer gcig na mtsho bskams te bi kra ma shI la rnam par gnon pa'i tshul khrims kyi gtsug lag khang zhes bya ba gtsug lag khang chen po bcu drug khang phran bdun brgya yod pa/ paNDYi ta bdun brgya gdan chags pa de bzhengs pa yin/ de la sras rgyal po dang / paNDYi ta dang / grub thob dang / sdig spyod rgyal po bzhi yod pa'i mtha' ma nor gyis brel re nas nor bu byin no/ /de la sras ma hi bA la smon lam gyi stobs yum la dad pa thob pa zhig byung ste/ des pha las nor bu brkus te dge slong yum 'chad pa zhig la phul bas/ yab kyi rig ste nor bu ni rgyal por dbang ba yin/ dge sbyong 'dod pa chung zhing chog shes par rigs pa las/ khyod de lta ma yin no zhes mgul pa bgags te bkrongs pa sher phyin dgu brgya pa mdzad mkhan gyi lwa ba pa yin zer/ dge slong shi ma thag rang gi slob ma rgyal bu'i sras su skye bar smon lam btab pas de ltar gyur nas/ rgyal po dharma pA la zhes bya ba yum la dad pa thob pa zhig tu gyur to/ /phyogs kun tu sher phyin 'chad pa 'tshol ba la zhugs pa na/ slob dpon sengge bzang po zhes bya ba rgyal rigs las rab tu byung ba/ phyi nang gi grub mtha' thams cad la mkhas pa/ khyad par du yum gyi don la ring du goms pa zhig byung ste/ des rang gi mkhan po rnam snang mdzad las byams pa'i sgrub thabs zhus/ sgrub pas rmi lam du dge slong gur kum