[A:54a]byed do zhes dril bsgrags pas phal cher yul gzhan du bros/ rtsod pa byas pa rnams chos kyis tshar bcad de bstan pa la bkod nas/ gal te chos kyi grags pa yi/ /smra ba'i nyi ma nub pa na/ /chos rnams gnyid log yang na shi /chos ma yin rnams da sdod longs/ /zhes gsungs so/ /bod ston dag de'i tshe chos kyi grags pas rgyal po me tog kun tu rgyas pa'i mdun sar sleb/ de'i rgyal pos da lta su mkhas dris pa na/ shes rab can ni phyogs kyi glang po ste/ /snyan dngags dpa' bo las byung sdeb sbyor mkhas/ /tsandra go mi brjod pa rnam par dag /me tog kun tu rgyas pa longs spyod ldan/ /phyogs las rnam par rgyal ba nga min su/ /zhes gsungs/ rgyal po na re dharma kIrti yin nam/ de skad du'ang grags so zhes gsungs kyang da lta su mkhas dris pas byon zin pa'i slob dpon dag gi mtshan brjod pas 'brel mi snang ba'i phyir/ tshigs bcad slob dpon 'di'i gsung min yang rgyal po des sbyin bdag byas nas tshad ma sde bdun mdzad de kun las btus kyi don zhib mo gtan la phab/ slob dpon 'di 'khor lo sdom pa'i rnal 'byor pa mthar mkha' spyod chen po sku tshe 'dir grub par 'jam dpal rtsa rgyud las/ yi ge dha zhes sdom brtson ni/ /lho yi phyogs su rnam par grags/ /pha rol rgol ba bzlog nas kyang / /de bzhin sdom brtson sngags kyang grub/ /ces lung bstan to/ /dpe bi kra ma shI lar slebs/ slob dpon gyi sde bdun phal cher gyis ma shes la/ shes pa 'gas kyang nyes so zhes phrag dog byas te dpe khyi'i mjug mar btags te khyi phyogs kun tu 'khyams pas bstan bcos kun tu dar bar gzigs te/ rnam 'grel gyi dbur/ skye bo phal cher phal la chags shing shes rab rtsal med pas na legs bshad rnams/ /zhes pa'i shlo ka bcug phyi nang gi rgol ba rnams tshar bcad pas rtog ge pa thams cad kyis gtsug gi nor bur bkur/ rnam 'grel le'u dang po la nyid kyis 'grel pa mdzad/ lhag ma la lha dbang blo 'grel pa rtsom du bcug nas grub pa dang gzigs su phul bas chus bkrus/ gnyis pa brtsams/ me la sreg gsum pa'i gzhug tu/ phal cher skal pa med nyid dang / /dus la'ang sdod pa med pa'i phyir/ /goms pa'i phyir ni mdor bsdus nas/ /dka' 'grel 'di ni 'dir byas so/ /zhes sbyar te phul bas/ 'phros dang tshig zur gyis bstan pa nges pa'i don rnams ma byung 'dug ste/ tshig gis dngos su bstan pa'i don byung 'dug gsungs