[A:53a]mjug ma la btags te dor la/ phyogs kyi glang po ni mun pa'i glang po/ kun las btus ni mun pa'i kun las btus zhes smod pa la rang gis 'grel pa byas te mu stegs mang po tshar bcad pas/ rnam nges su gang la 'phags pa nyid kyis rjes bzung de ni dpal ldan dri med blo mnga' ste/ /'jig rten blo gros blun po 'dis ni de tshig brling ba gsal bar ma rtogs pas/ /nyer rten 'jig rten rgyas mdzad de ni rmongs pas cung zad smad par byung na yang / /don min skye bar 'gyur ba yin pas brtse bas de yi lugs ni gsal bar bya/ /zhes gsungs so/ /de'i slob ma dbang phyug sde/ des kyang de la 'grel bshad/ de'i slob ma ni dpal chos kyi grags pa ste/ rgya gar lho phyogs rgyal dbang gtsug gi nor bu zhes bya bar mu stegs bram ze'i rigs su skyes te chung ngu la sgra legs par 'byongs nas/ zhang po mu stegs kyi ston pa gzhon nu ma len la mu stegs kyi bram ze rab tu byung ba'i chas blangs nas zhang pos ngan mang du smras te bskrad do/ /der thugs la mu stegs thams cad pham par byed pa zhig bya'o snyam nas nang pa'i bstan pa la rab tu byung nas sbyangs pa mdzad cing / khyad par slob dpon dbang phyug sde la tshad ma nyan pas slob dpon dbang phyug sdes ji ltar dgongs pa ltar ro/ /gnyis pa zhus pas phyogs glang gi dgongs pa bzhin/ gsum pa gsung bar zhus pas phyogs glang la slob ma nga lta bu las med/ nga la'ang khyod lta bu las ma byung / tshar re las bshad pa'i srol med pa la gnyis su'ang bshad/ nga 'di gcig pu 'chad pas mi phan/ paNDYi ta'i bya ba gzhan yang bya dgos pas ras snum sta gon gyis shig nub mo 'chad do gsungs nas de ltar byas pas/ 'bras bu rgyu'i khyad par gyi rjes su byed pa lhag par rtogs te/ slob dpon la sngar gyi tshul brjod pas shin tu mnyes nas/ da khyod kyis nga'i nor ba rnams phyogs sngar gyis la kun las btus la 'grel pa gyis shig ces rjes su gnang ngo / /de nas grangs can gyi rtog ge'i gsang tshig rnams rtogs pa'i don du/ bran du brdzus te zhang po'i chung ma'i g.yog byas nas mgu bar byas te/ grub mtha'i gnad 'di 'dra dri dgos byas pas/ 'dod pa spyod pa'i tshe 'dri yi khyod rang yid la zungs zer nas mo'i rkang pa la thi gu btags/ rang mal khri'i 'og tu 'dug nas gang dka' ba de la thag pa 'then nas legs par shes pa dang / bros te grub mtha'i gnad lon pas thams cad thub par shes/ de'i tshe mu stegs kyi mkhas pa yod na rtsod par