[A:52a]gyur pa 'gro la phan bzhed pa/ /ston pa bde gshegs skyob la phyag 'tshal te/ /tshad ma bsgrub phyir rang gi gzhung kun las/ /btus te sna tshogs 'thor rnams 'dir gcig bya/ /zhes bris pa'i mod la sa g.yo ba dang / 'od dang / sgra chen po grags/ mu stegs kyi ston pa dag shing bzhin du rengs pa'i ltas khyad par can du ma byung / der de'i nye logs na mu stegs kyi ston pa thub rgyal nag po zhes bya ba zhig yod pas mngon shes phra mos bltas pas/ de'i mthur shes nas de la de lta bu 'byung ba ci yin bltas pas/ de las bstan bcos chen po zhig byung ste mu stegs rnams la gnod par shes nas/ slob dpon bsod snyoms la gshegs pa'i shul du phyin te bsubs so/ /de bzhin lan gnyis su bsub pa dang / slob dpon gyis gsum pa bris nas mjug tu ngas bris pa'i tshigs su bcad pa bsubs pa su yin/ ku re dang kyal kha'i ched du yin na dgos pa rgya chen po yod pas ma subs cig phrag dog gi dbang gis yin na blo la yod pas dbyi bar mi nus so tshig don la 'khrul lam snyam na lus snang bar gyis shig brtsad par bya'o/ /zhes bris pas yang ltas sngar bzhin byung ste/ bsub par yong bas brtsad par bya'o zhes pa mthong ste ma bsub par bsdad do/ /slob dpon bsod snyoms 'khor ba dang phrad nas bstan pa rgyan du btsugs te rtsod pas mu stegs pham ste da khyod nang pa'i bstan pa la zhugs gsungs pas/ kho khros nas kha nas me spar te slob dpon gyi yo byad thams cad bsregs shing slob dpon nyid kyang tshig la khad nas/ rnam nges Tikka las/ 'khor ba la yid 'byung nas sems can gyi don las gzhan du phyogs te gcig pu grol bar 'dod pas/ skad cig de la 'phags pa 'jam dpal byon nas/ bu skye bo ngan pa dang rjes su mthun par sems sngar bas gzhan gyi dbang du gyur te/ sems yod bzhin du ci'i phyir btang snyoms su byed ces gsungs pa dang / lan du bcom ldan 'das 'khor ba'i bzod par dka' ba'i sdug bsngal du ma dang ldan pas brten par mi nus la/ sems kyang dam pa ma yin pa'i skye bo la dga' bas g.yo bar spyod cing / khyed mthong yang bdag la byin gyis ma brlab na de la ci zhig bgyi zhes zhus pa dang / lan du/ bu ji srid sa ma thob kyi bar du khyod kyi dge ba'i bshes gnyen ni nga nyid do zhes gsungs nas mi snang bar gyur to zhes byung ngo / /de nas des tshad ma mdo kun las btus brtsams te mkhas pa'i grwar 'grims pas tshig brling nas phal gyis ma rtogs la/ rtogs pa 'gas kyang phrag dog gi dbang gis khyi'i