[A:29a]bsur 'ongs nas ganggA'i dbus su sleb pa na/ drang srong zhig 'khor lnga brgya dang bcas pas rab tu byung bar zhus pas/ kun dga' bos ganggA'i dbus su gling sprul te der bsnyen par rdzogs/ de ma thag dgra bcom par gyur pas dgra bcom pa nyi ma gung pa'am chu'i dbus pa zhes grags so/ /des mkhan po'i sngon tu mya ngan las 'da' bar gsol bas/ ston pas khyod kha cher bstan pa rgyas par lung bstan pas de bzhin gyis shig des de bzhin bgyi'o zhes khas blangs te kun dga' bo cho 'phrul sna tshogs bstan te sku gdung gi phyed ma skyes dgra/ phyed yangs pa can pas khyer te yangs pa can dang skya nar bur mchod rten brtsigs so/ /sha na'i gos can grags pa dgra bcom pa sde snod gsum la mkhas pa ste/ chos rgyal mya ngan med kyis sbyin bdag byas/ rgyal po de'ang 'jam dpal rtsa rgyud las/ ston pa mya ngan las 'das nas lo brgya na 'byung / brgya dang lnga bcur 'tsho/ lo brgyad cu rtsa bdun du mchod rten mchod par bstan/ des sku gdung gi mchod rten bdun nas sangs rgyas kyi ring bsrel phyung ste 'dzam bu'i gling gi sa'i phyogs thams cad du rin po che sna bdun gyi mchod rten bye ba brgyad khri bzhi stong byed par ston pas lung bstan pa bzhin gnod sbyin shing rta zhes pas grogs bgyis te byas/ de la dgra bcom pa rnams kyis/ mya ngan med rgyal skya nar bur gnas pas/ /mchod rten bdun po rgya cher spel byas te/ /de yi mthu yis dbyig 'dzin 'dir yang ni/ /smon lam dngos po mngon par brgyan gyur te/ /zhes bsngags so/ /de dag gi rab tu gnas pa bgyis shing nyer sbas la bstan pa gtad de mya ngan las 'das so/ /nyer sbas ni lung phran tshegs las/ nga 'das nas lo brgya na spos tshong sbas pa'i bu nyer sbas zhes bya ba rab tu byung nas mtshan med pa'i sangs rgyas su 'gyur te sangs rgyas kyi bya ba byed do zhes ston pas lung bstan pa/ grags pa las rab tu byung zhing dgra bcom pa sde snod gsum pa ste/ bdud sdig can gyis de 'khor la chos ston pa na sprul pa bstan nas 'khor rnams g.yengs su bcug nas 'bras bu thob pa'i gegs byas pas/ des ro gsum me tog gi phreng bar sprul te de'i mgo la btags pas sdig pa'i sems skyes na ro dri nga ba/ dge ba'i sems skyes na me tog nyid du snang ba de lta bu'i cod pan sus kyang 'bor ma nus pa de nyid la btud de phyin chad sdig sems mi 'cha'o zhes grags so/ /phug srid du khru bco brgyad/ rgyar khru bcu gnyis pa la/ de'i gdam ngag bdun gyis