[A:292a]la skyes mchog smon lam dpal ba dang / 'jam dbyangs pa sogs mang zhig byung / skyes mchog pa'i slob ma la rdza sna pa/ rgyal dbang rjes lung mang bar mtshan gsol ba de sogs 'brog phyogs na shin tu dar/ sgrub skor gyi bka' lung la'ang phan shin tu thogs/ li ras la sgro ston sogs slob ma legs par byung / rnal 'byor gsum ni/ jo yes/ dga' yes/ bde yes gsum/ jo yes chos rje'i bka'i sdud pa po yin pas gdam ngag che/ khong la skyi ston dbyar ras sogs slob ma mang / grar dga' ldan btab/ de dag la sogs pa nyis stong brgyad brgya'i slob rgyun la bu chung brgyud/ gnyis ka bsdoms pa la bar 'brug ces grags so// // ! lo ras ni 'khrungs sa gzhung gi grags chen/ gdung lo/ yab rnal 'byor dang / yum me bza' skyid la sras med nas/ 'brug tu chos rje dang / lha sar jo bo thugs rje chen po la mchod pa rgya chen po byas pas byung ba yin/ mtshan lo bde ba skyong / chos kyi bag chags bzang bas lo gsum bzhi nas bri klog mkhyen/ sku'i cho bzang bas lo lnga dang drug gnyis la chos la 'bros par brtsams/ yab yum gyi mtha' bzhi shag dar gyi bu mo jo mor bsus/ bdun pa la bros nas 'brug tu slebs/ der rjes spal ti la gtad nas skyor mo lung du skra bcad/ mtshan grags pa dbang phyug tu gsol/ yul nas bdas mi byung / skor cig byon pa na jo mo dang lhan cig rkang pa lcags su bcug kyang ma chags par slar chos rje'i sku drung du byon/ gdam ngag rnams legs par gsan/ de nas yab sras zhal dan nas chos rje dpon slob gtos che ba gzhung du spyan drangs/ mi rnams kyis 'tshengs pa gsum chos rje dpon slob 'bul bas 'tshengs pa/ mtha' bzhi shag dar nor gyis 'tshengs pa/ khong rang chos mdzad rgyu byung bas 'tshengs pa zer ro/ /de nas chos rjes thugs la btags/ gdam ngag thams cad sba sri med par gnang / dgung lo bcu gsum lon pa'i tshe kha rag tu byon/ der jo gdan kun rgyal zer ba lo mnyam zhig kyang phyag phyir 'byor/ khong bsod snyoms la song ba'i shul du kha ba chen po bab de la kho ma thar/ bla ma la gsol zas med snyam khos snying rus bskyed 'ongs nas phug pa'i phyi/ chos rjes nang nas brkos pas 'phrod tsam byung / der bsnyun gzhi dam po zhig byung ba sdig sgrib