[A:287a]dus su padma sambha wa'i lung bstan/ sa ral zhes pa'i lung gsum mdor/ /nor bu 'dzin pa'i sprul pa 'byung / /pha bong sho 'dra'i kha nas chos 'chad rtsom zhes pa ltar/ der byis pa rnams khrid pha bong de khrir byas nas chos 'chad pa'i tshul gyis rtse/ nangs shig de'i 'khris kyi rdo la zhabs kyi padmo gnyis shin tu gsal bar bkod/ gcen chen po skal ldan bya bas dgung lo bcu gnyis pa la khu lung du slob dpon mkhar lung pa can khrid lo brgyad bsten te tshad ma'i grwa sa yin pas/ der sbyangs pa mthar phyin/ grwa bskor yang mdzad/ slob dpon mnyes nas mtshan shes rab bdud rtsi'i 'khor lor gsol/ gzhan slob dpon rta thang pa la mngon pa/ lhan gyi so dar ma sengge la sgyu 'phrul mdo rgyud sogs sbyangs/ gzhan yang bla ma 'ga' re bsten/ dgung lo nyer gsum pa la grub thob gling ra lung du phebs pa dang mjal/ gsung gleng tsam mdzad/ de nas dbus su byon/ sna phur mjal nas dbang rgyud gdam ngag zhus/ zhag bdun nas ras thub/ yang yul du skor cig brgyags len du byon/ phyir sna phur log bla ma 'bul bas mnyes par byas te dgun 'dag sbyar mdzad de bsgoms pas/ rlung phyi nang bsre nus pa dang / rtsig pa la thogs pa med pa dang / ting nge 'dzin gsal stong nam mkha' dwangs pa lta bu la 'byams nas bsgom bya sgom byed stor 'gro bar 'dug nas/ bla ma la'ang 'di las med dam snyam mtshams grol ba'i dus zhus pas/ ngo mtshar che rje btsun mi la'ang de ltar byung 'dug gsung / bsgom bya sgom byed mi gda' na zhus pas/ bu de kun nyams yin/ rtogs pa bsha' ma zhig da ste lo lnga na 'byung gsungs/ spyir sna phur lo bzhi bzhugs/ gdam ngag thams cad tshar/ lung bstan nas mkhar chur 'gro ba'i dgongs pa zhus pas/ ro snyoms gter na yod tshul/ de 'don pa khyod yin te da lo res sdod gsungs/ nan gyi zhus pas khrol te rngog rdo rje sengge la dgyes gdan yA gsum gsan pa la zla ba brgyad tsam thogs/ de'i ring la bla ma mya ngan las 'das nas mi 'dug 'dad dang gdung khang bzheng pa la lo gcig 'gor/ de nas lho brag mkhar chur byon/ lo gsum bzhugs/ dpon slob bdun yod/ 'tsho ba shin tu bkres la kha lhags kyis mnar bas sku'i mdangs shor/ yul mi rnams kyis 'dre mo spun bdun zhes btags/ der phyag phyi ba rnams kyis rkyen ma theg par log jo kun dga' sgra zer