[A:27a]pa lung bstan pa'i dus dang mi 'grigs pas so sos bzhi bcu lhag tsam re'o/ /de ltar 'od srung gis ston pa'i gsungs ci nus su bsgrubs shing gdul bya mang po rnam par grol ba la bkod nas bstan pa la phan gdags pa mdzad nas mya ngan las 'da' bar dgongs te/ bdag gis thub pa'i mdo sde ni/ /yang dag bsdus nas chos lam bzhag /gcig nas gcig tu yun ring bar/ /ston pa'i gsung 'di gnas par 'gyur/ /ngo tsha med rnams chad pas bcad/ /ngo tsha byed ni yongs su gzung / /bdag gis phan dang dge byas pas/ /bdag ni mya ngan 'da' dus bab/ /kun dga' bo shes par gyis shig ston pas nga la bstan pa gtad nas 'das so/ /nga'ang mya ngan las 'da' bas bstan pa khyod kyis skyongs shig khyod kyis kyang sha na'i gos can la gtod cig de nas 'od srung gis sku gdung gi mchod rten dang tshems mche ba rnams mchod de/ lho phyogs kyi ri bya rkang la 'dzegs te kha phye ba'i dbus su rtswa bting / bcom ldan 'das kyi phyag dar khrod kyi snam sbyar gyon nas byams pa sangs rgyas kyi bar du sku gdung mi nyams par byin gyis brlabs te cho 'phrul du ma bstan nas mya ngan las 'das so/ /de nas lha rnams kyis mchod/ ri 'byar te ma skyes dgras mthong ba'i skabs phye bas/ de'i tshe ma skyes dgras rgyal rigs kyi zhang po rgyud 'chad pa rmis nas/ sad pa dang 'od srung 'das pa thos te/ kun dga' bo dang lhan cig ri bya rkang la phyin/ gnod sbyin gyis ri phye ba de la rgyal pos phyag mchod byas te bsregs par brtsams pa dang / kun dga' bos/ 'di ni byams pa'i gsung rab byung gi bar byin gyis brlabs te/ byams pa'i 'dus pa dang po la nyan thos bye ba dgu bcu rtsa dgu dang bcas pas 'dir byon nas/ 'di'i sku gdung phyag mthil du bsnams nas bstan te/ 'di ni shAkya thub pa'i nyan thos sbyangs pa'i yon tan la gnas pa'i mchog yin la/ 'dis bgos pa'i snam sbyar yang ston pa de'i yin no/ /'di na ni de lta bu dge sbyong sbyangs pa'i yon tan la gnas pa ci'ang med do zhes gsungs te/ 'od srung gi spur de cho 'phrul chen po bstan nas lhag ma med par dbyings su thim pas/ de dag gis sbyangs pa'i yon tan blangs te dgra bcom pa thob par 'gyur bas bsreg par mi nus so/ /zhes gdams te phyir log pa na ri kha 'byar de'i rtser sku gdung gi mchod rten brtsigs so/ /kun dga' bo ni ston pa'i khu bo bdud rtsi zas kyi bu/ /ston pa sangs rgyas pa'i dus sgra gcan