[A:269a]sprin gyi gseb tu sangs rgyas dang byang sems mngon sum du byon pa/ lha'i bu dang bu mo rnams kyis nam mkha' nas mngon sum du mchod pa 'bul ba la sogs pa'i rdzu 'phrul dang ngo mtshar ba'i ltas dpag tu med pa bstan pas rgyal po 'khor dang bcas pa dad pa lhag par spel nas yang dag pa'i lam la bkod/ gong nas mtshan de bzhin gshegs par gsol lo/ /de nas rim par byon pas dbus gtsang khams su karma kaM tshang pa zhes bya ba'i lugs dar ro/ /chos kyi rgyal po zla 'od gzhon nu'i sras kyi thu bo dpal phag mo gru pa ni/ yul 'dod khams kyi lho rgyud 'bri lung rme shod kyi stag ngos sab khang bya bar/ gdung rus dbas we na 'phan thog gi rigs/ yab dbas we na a dar bya ba dang / yum re dbye bza' btsun ne bya ba sras su bltams/ de dus yum gyi rmi lam du gser gyi rdo rje rtse dgu pa zhig skyes pa thu bar bzhag pa las phyogs bcur 'od zer 'phros pa rmis/ dgung lo dgu pa la bya khyi lha khang bya bar mkhan po lhing nge yan thub bu tshul khrims bya ba dang / slob dpon lhing nge 'od zer rgyal mtshan las rab tu byung / mtshan rdo rje rgyal por gsol/ yi ge ma bslabs par mkhyen pas mkhan po dngul 'bum bzheng pa'i zhabs tog mdzad/ khams rang du slob dpon bcu drug tsam bsten/ gzhan la spyod 'jug lan 'ga' re bshad/ mkhan slob thugs mnyes pas dbus su rdzong bar zhal 'cham ste/ dbas chen po dang stabs su byon/ khong la rdzas chen po mnga' ba dang gcig byas chog pa byung / sog gi mer nag khar phebs pa'i tshe dbus gtsang gi phyogs thams cad nag po ra ri zhig gis khengs 'dug pa la/ mi g.yo ba'i sku chung ngu zhig gi ral gris bcad nas phyogs thams cad skya bsang la song ba'i snang ba byung / dgung lo bcu dgu pa stod lung du 'byor/ rgya dmar pa'i sar gzhi phab/ dbu tshad nyan/ zhar chos pa dge bshes phya pa la zhus/ de nas khong gi phyag phyir gsang phur phebs/ slob gnyer mthil phyin mdzad pas khams pa gcig la ston pa bzang bar grags/ de dus khams pa sde tshan rnams kyis g.yag brkus pa phywa pas dgongs nas gzigs su phebs pas/ sta gri bsnams te bdas pas/ slob dpon spyil bur tshud sgo'i ya them la phog pa da lta'ang yod/ de lta bur sdig bsags pa shin tu byang dka' bar byung