[A:266a]dar yul ba sogs mang du bsten/ sgam po pas lung bstan nas/ 'ol dga'i brag gu ri bo che'i brag phug cig tu bzhugs pas/ bud med cig na re/ nga'i ma jo 'ong ngo khyod ma bzhugs zer bas/ byams snying rje byang chub kyi sems la gnad du bsnun zla ba bcu bzhir bzhugs pas drod klong du tshud/ rtags ngo mtshar nges shes khyad par can skyes/ de nas chos rje ja lkog na bzhugs dus rtogs pa phul bas khyod kyi don de nor 'dug nga khyod la re che ba yin pas/ da dung sgoms gsungs/ zla ba drug bsgoms pas sngar gyi de las ma 'gyur/ yang zhus pas phyag spyi bor bzhag bu 'khor ba dang 'brel thag chod pa yin no gsungs/ de nas mon rgyal pos sbyin bdag byas sha 'ug stag sgor byon/ 'khor 'das dbyer med du song / de nas gnas nges med du byon gyin bsgrub pa mdzad/ lnga bcu pa la khams su byon nas kam po gnas nang du bzhugs/ de nas tre bor byon dge 'dun stong tsam 'dus/ de nas sgom tshul gyi zhal nas/ khyod khams su skyid sdug ci byung yang yar shog gsung ba'i bka' sgrub pa dang / gzhung 'tshur gyi bar 'dir dgon pa 'debs pa dang / dwags lha sgam por gser gyi glegs bam brgya 'bul ba dang / bla ma zhang gi 'khrug pa la mi rnams mi dga' bar 'dug pas/ khong la 'khrug pa mi mdzad pa'i zhu ba 'bul ba rnams la byon/ zhang la zhu ba phul bas de nas 'khrug pa ma mdzad/ 'tshur phur dgon pa btab/ brgyad cu rtsa bzhi bzhes pa la gshegs/ de'i slob ma sangs rgyas ras chen lo dgu bzhes pa'i tshe/ zangs ri ras pa'i rtsar byon/ ras chung pa'i gdam ngag gsan/ bde gsal mi rtog pa'i nyams khor yug tu shar/ na bza' ras rkyang du mdzad pas ras chen du grags/ lo bco lnga pa la bla ma gshegs/ de nas phag gru sogs dang / lhag par sgam po gnas nang du byon nas dus gsum mkhyen pa bsten/ gdam ngag rdzogs par gsan/ de'i slob ma spom brag pa yin te/ 'bri rgyal dam pa chos 'phyug bya bar 'khrungs/ bcu bzhi bzhes pa la ras chen pa'i snyan pa gsan nas 'bob pa skar sgang du sangs rgyas ras chen mjal/ phyag na rdo rje dngos yin pa'i snang ba shar/ gdam ngag rdzogs/ spel sgo dgon par lo bcu drug tu bsgrub pa mdzad dag pa'i snang ba shar/ snyan pas phyogs thams cad du khyab/ de nas khra shod