[A:263a]dbon rim par byon pa/ dkar brgyud kun gyi gtsug rgyan sgam po pa zhes grags so/ /rje zla 'od gzhon nus zangs lung nas lung bstan/ skye bo ye shes rdo rjes gnas kyi sgo phye ba nas/ ding sang gi bar du 'gro ba rnams kyi bsod nams kyi myu gu skye ba'i zhing / ji tsam du nyung ba'i dus na'ang sgom chen stong phrag tsam 'khor mor tshogs pas sgrub brgyud kyi srog shing tshugs pa'i phyir/ sgrub brgyud bstan pa'i srog shing tsa ri ba zhes bya'o/ /rje tshul khrims snying po'i slob ma'i thu bo 'gro ba'i mgon po g.yu brag pa yin te/ yul lha sa'i tsha ba gru/ sngags rigs su 'khrungs/ chos kyi bag chags bzang / bye'u ston pa la sdud pa/ gshen la mtshan brjod/ rngog la mdo sde dgyes rdor/ gur ma yA/ gsang ldan/ sam bu lo tsA la mngon pa dang tshad ma bslabs/ bco brgyad pa la pha tshan gyi brnyas pa byung bas mthu lo gsum bsgrubs nas tshar bcad/ khams su byon/ nyi shu rtsa bzhi la mnal lam du rna nas rna khrag mang po 'dzag pa'i mthar sbrul 'dra ba'i sems can ring mo zhig thon nas nub phyogs su rgyang ring por song / der khyod dang yun ring 'grogs te da ni mi phrad snyam pa byung / gser g.yu 'dor/ 'khor ba las yid byung nas mthu mdzad 'phro'i bca' gzhi bshig pas slob ma zhig yod pas slob dpon de 'dra ma byed zer du byung / nyer drug pa la dkon mchog brtsegs pa gzigs pas dad pa chen po 'khrungs/ mkhan po dge ba'i bshes gnyen mkhar sgo ba dang / slob dpon grab mkhar ba/ gsang ston gzung ljang mdo ba rnams kyis byas te bsnyen par rdzogs/ mtshan brtson 'grus grags par gsol/ lo gcig cog pu dang stan gcig mdzad/ dpal rga lo sog tu phebs pa mjal te rim pas gdam ngag gsan/ rgya gar gyi mkhas pa bai ro tsa na dang mjal/ rang yul du log bsgoms pas thig le'i gegs byung / rga lo thag ring / yer pa ba la gtugs/ lo gsum song ba dang rga lo mjal gdam ngag lhag ma zhus/ dgung lo so gsum pa la/ slob dpon sgom pa lha sar zhig gsos mdzad pa'i tshe mjal/ lhan cig skyes sbyor gnang nas bsgoms pas sngar gyi sgom thams cad shes pa kha phyir bltas su 'dug da ni sgom mkhan rang gtan la 'bebs par 'dug snyam dga'/ rtogs pa'i sa mtshams ma phyed pa la ban da bun dar song /