[A:252a]khyod lo ji tsam thub par 'dod gsungs/ shi'ang mi lto snyam pa tshun zhus pas/ bod ngan pa/ bsam pa mtho dma' nges pa med/ bu pha'i tshe dang mnyam pa zhig bya yi gsungs/ brgyad cu rtsa brgyad thub par lung bstan/ de nas gdam ngag rnams tshang bar byas nas log 'byon khar ti bus khyod kyis sgra mi shes pa'i skyon gyis dpe 'di rnams bod skad du ji lta bar bsgyur med pa 'dra ste/ lam du mkha' 'gro ma zhig gis zhus dag byed par 'gyur ro sogs zhal bkod thems par stsal/ ma gcig 'di de dus skal ba dang ldan pa rnams rjes su 'dzin/ gzhan phal pas mthong bar mi nus pa zhig go /ji ltar gsung pa bzhin bal por phebs dus bha ri mas bsus te dpe rnams kyi lhag chad bsal tshur byon thugs la khengs pa cung zad 'khrungs pa/ rje btsun gyis rdzu 'phrul bstan de bzlog bla ma la gdams pa yar skyes su phul ba/ de yang / lus med mkha' 'gro'i chos skor la/ /lhag chad nor 'khrul mkha' 'gros bsal/ /zab dang yang zab bka' rgyas btab/ /'chi med bdud rtsi'i bcud len dang / /gzhan yang gser dang 'dra ba'i chos/ /ngo sprod gnad kyi bar do dang / /bsam gtan thun 'jog gdam ngag dang / /brda don gsum dang rin chen lnga/ /nyams su len pa'i chos drug dang / /zhes bya ba rnams so/ /gzhan/ bod phrug rgya gar phyin pa la/ /gdams pa bdag rang che'o snyam/ /zhes gsungs/ de nas nya ma rnams rje btsun yab las sras ngo mtshar che ba skad zer bas sdig tu 'gyur snyam nan gyis zhus/ snye nam drod phug tu mkha' 'gro snyan rgyud kyi gdam ngag rnams phri bsnan lhag chad med par gnang / rje btsun gyis mar pa la gsan pa thams cad thugs sras ras chung pa la tshang bar bzhugs skad/ de nas dbus la byon sum 'phreng du a su mjal ba la 'gyur gyi do ha gsan/ yar klungs su rje btsun sku mtshar ba dang / dbus mo'i gsol nyams nang 'dzom lo gsum pho brang skyor ldem du grags par rgyal po'i sras tshab mdzad/ rje btsun gyis mdze por sprul nas g.yu bslangs/ ras chung pa gtong phod che bas sbyin/ des yab yum khros te slar rje btsun gyi drung du bzhugs/ g.yu sprang po la sbyin pa mi las lon/ /do nub bde mchog gi dbang yon mdzod/ /gsungs/ de nas re zhig na/ da ni ras chung dbus su song / /dbu ru byang ngos 'grims la