[A:232a]gyis mdzad pa rin po che'i rgyan bya ba zhig yod/ dpe khams su shor nas de dang 'dra ba zhig byed gsungs pas de ltar grags so zer ba blun gtam yin/ rje yab sras kyi bka' yang dag pa'i tshad ma lus lta bu de la rgyan btags pa 'dra bar 'di mdzad/ gzhan gur/ sambu Ti dang / mtshan brjod la'ang mdzad/ man ngag gi yi ge'ang mang ngo / /de la slob ma rtsags chos kyi rgyal po/ mgar bkra shis rin chen/ 'tsho'u dar re/ mal yer pa ba/ tre po mgon po/ ngor rje kun dga' 'od/ shen rdo rje sengge/ mnyam med shAkya ye shes/ cog ro chos kyi rgyal mtshan/ lha phug mkhar ba/ rngog tsha chos sku/ dran ston mtha' bral/ lho nag gnyal ba rdog rgya tsha rin chen mgon sogs mtha' yas pa zhig byung / sras gtsang tsha jo tshul/ mtshan tshul khrims bla ma/ de'i sras rngog kun dga' rdo rje/ 'di byung nas yab kyis dge slong mdzad de ring por ma lon par gshegs pas mes kyis bskyangs/ dgung lo bcu lon tshe mes gshegs/ bla ma mang po las thos pa mdzad/ 'chad nyan legs par byas/ slob ma mang du thon/ spre zhing btab/ bdun cu rtsa brgyad pa la gshegs/ de'i sras gzi brjid grags pa/ yab zhe drug bzhes pa la 'khrungs chos rnams yab dang lo ras sogs las gsan/ bya 'dul gyi slob ma 'char ba la bsnyen par rdzogs/ brgyad cu bzhugs/ 'chad nyan mdzad slob ma'ang legs par thon/ khong gi gcung po rgyal po dga'i sras bla ma rin chen bzang po/ khu bo la rngog chos/ gzhan yang mang du bsten/ zul phur bsnyen par rdzogs/ nyer bdun bzhes pa la khu bo grongs khams su byon/ tshal pas bla mar khur/ bka' bstan 'gyur ro cog bzhengs/ 'chad nyan dar/ bdun cu rtsa bdun la gshegs/ rin chen bzang po'i gcung po la sras lnga byung ba'i che ba slob dpon chos kyi rgyal mtshan khu bo sogs las thos pa mdzad/ so bdun pa la rin chen bzang po gshegs/ khams dar rtse mdo thug byon/ bstan pa bskyangs/ 'phrin las che/ bdun cu rtsa bdun pa la grongs de'i gcung po sengge 'bum gyi sras don grub dpal/ de'i sras byang chub dpal/ de rin po che chos rgyal ba gshegs pa'i phyi lo 'khrungs/ sum cu rtsa dgu'i bar du yab kyi nye gnas